განათლების მინისტრი: სასკოლო ფორმების დანერგვა ეტაპობრივად მოხდება
საქართველოს განათლების მინისტრის, გივი მიქანაძის განცხადებით, სამინისტრომ გადაწყვიტა, სასკოლო ფორმების კულტურა თავდაპირველად დაწყებით კლასებში დამკვიდრდეს, შემდეგ კი ყოველწლიურად თითო ახალი კლასი დაემატოს.
ამის შესახებ მინისტრმა პარლამენტის პლენარულ სხდომაზე ისაუბრა და აღნიშნა, რომ გადაწყვეტილების მთავარი მიზანი პროცესის მშვიდ და ეტაპობრივად განხორციელებაა, რათა სკოლებში ზედმეტი დაძაბულობა არ შეიქმნას.
გივი მიქანაძის განმარტებით, საქართველოს დამოუკიდებლობის აღდგენის შემდეგ საჯარო სკოლებში სასკოლო ფორმის ტრადიცია პრაქტიკულად არ არსებობდა. მისი თქმით, ფორმა ძირითადად კერძო სკოლებში გამოიყენებოდა და ისიც არა ყველა სასწავლებელში, რის გამოც საზოგადოების დიდი ნაწილი ამ პრაქტიკას შეჩვეული არ არის.
მინისტრის განცხადებით, სწორედ ამ გარემოების გათვალისწინებით შეირჩა ეტაპობრივი მოდელი. მისი თქმით, თუ მიმდინარე სასწავლო წელს ფორმებს მეექვსე კლასის მოსწავლეები ჩაიცვამენ, მომდევნო წლებში პროგრამას მეშვიდე, შემდეგ კი მერვე კლასებიც დაემატება.
როგორც მინისტრმა აღნიშნა, რამდენიმე წლის განმავლობაში ეს მიდგომა სკოლებში ფორმის ტარების კულტურის ბუნებრივად ჩამოყალიბებას შეუწყობს ხელს.
გივი მიქანაძის შეფასებით, ეტაპობრივი დანერგვის მოდელი ასევე ხელს შეუწყობს შესაძლო დაპირისპირებისა და კონფლიქტების თავიდან აცილებას როგორც მოსწავლეებსა და მასწავლებლებს შორის, ისე სკოლების ადმინისტრაციებთან.
QR კოდი
სტატიის ციტირება
შენი ამბები. (2026). სასკოლო ფორმების პროგრამა მომავალში VII-X კლასებზეც გავრცელდება. 28 მაისი, 2026. https://sheniekimi.ge/ambebi/სასკოლო-ფორმების-პროგრამ/
