განათლების მინისტრი: სახელმწიფო უნივერსიტეტებში სწავლის საფასურის დაფარვის შემდეგ ეს ინფორმაცია აბიტურიენტებისთვის პრიორიტეტული აღარ იქნება
საქართველოს განათლების, მეცნიერებისა და ახალგაზრდობის მინისტრის, გივი მიქანაძის განცხადებით, სახელმწიფო უნივერსიტეტებში სწავლის საფასურის სრულად დაფინანსების შემდეგ აბიტურიენტებისთვის პროგრამების ღირებულების მითითება ნაკლებად მნიშვნელოვანი გახდება. ამის შესახებ მინისტრმა პარლამენტის პლენარულ სხდომაზე, ინტერპელაციის ფორმატში გამოსვლისას განაცხადა.
გივი მიქანაძე ოპოზიციის კითხვებს პასუხობდა, რომლებიც აბიტურიენტთა ცნობარში პროგრამების ღირებულებისა და კრედიტების შესახებ ინფორმაციის არარსებობას, ასევე რეგისტრაციის ვადების აპრილში გადატანას ეხებოდა.
მინისტრის განმარტებით, აბიტურიენტთა ცნობარი პირველ რიგში საინფორმაციო გზამკვლევია, რომლის დანიშნულებაა მოსწავლეებს ერთიანი ეროვნული გამოცდების პროცესთან დაკავშირებული დეტალური ინფორმაცია მიაწოდოს. მისი თქმით, აღნიშნულ დოკუმენტში ყოველთვის აისახებოდა გამოცდებთან, რეგისტრაციასთან, პროგრამების არჩევასთან, შედეგებთან და აპელაციის პროცედურებთან დაკავშირებული საკითხები, თუმცა დაფინანსების მეთოდოლოგია მასში არასოდეს შედიოდა.
გივი მიქანაძის განცხადებით, სახელმწიფო უნივერსიტეტებში სწავლის საფასურის დაფარვის პირობებში სტუდენტებისთვის პროგრამების ფასების მითითება პრაქტიკულ მნიშვნელობას კარგავს, რადგან სწავლის ხარჯებს სახელმწიფო ბიუჯეტი დაფარავს. კერძო უნივერსიტეტებთან დაკავშირებით კი, მისი თქმით, სწავლის საფასური კვლავ მითითებული დარჩება.
მინისტრს პარლამენტში ასევე ჰკითხეს, რატომ გადაიწია აბიტურიენტთა რეგისტრაციისა და ცნობარის გამოქვეყნების პროცესი მარტიდან აპრილში. მიქანაძის თქმით, მიუხედავად კრიტიკისა, ამ ცვლილებას აბიტურიენტების ინტერესებზე უარყოფითი გავლენა არ მოუხდენია.
მისივე განმარტებით, რეგისტრაციისა და საგამოცდო პროცესისთვის განსაზღვრული ვადები არ შემცირებულა და აბიტურიენტებს გამოცდებისთვის მოსამზადებლად და რეგისტრაციის გასავლელად საკმარისი დრო ჰქონდათ.
შეგახსენებთ, რომ გასული წლის ბოლოს მთავრობამ პარლამენტში წარადგინა უმაღლესი განათლების შესახებ კანონში ცვლილებები, რომლის მიხედვითაც 2026 წლიდან სახელმწიფო უნივერსიტეტებში სტუდენტების სწავლას სახელმწიფო სრულად დააფინანსებს. ამავე ცვლილებების ფარგლებში უქმდება 2250-ლარიანი სასწავლო გრანტის სისტემა, რის გამოც კერძო უნივერსიტეტებში ჩარიცხული სტუდენტები სახელმწიფო გრანტით ვეღარ ისარგებლებენ.
