განათლების სამინისტრო: სასკოლო ფორმებით პირველ ეტაპზე პირველკლასელები უზრუნველყოფილნი იქნებიან
საქართველოს განათლების სამინისტროში აცხადებენ, რომ ახალი სასწავლო წლის დაწყებისთვის, 15 სექტემბრისთვის, სასკოლო ფორმები პირველ რიგში პირველკლასელებს გადაეცემათ, ხოლო დაწყებითი საფეხურის დანარჩენი მოსწავლეები ფორმებს ეტაპობრივად, პირველი სემესტრის განმავლობაში მიიღებენ. ამის შესახებ პარლამენტში ინტერპელაციის ფორმატში გამოსვლისას განათლების მინისტრმა გივი მიქანაძემ ისაუბრა.
მინისტრის განმარტებით, სასკოლო ფორმების შესყიდვის პროცესში მონაწილეობა მიიღეს როგორც ქართულმა, ისე უცხოურმა კომპანიებმა, თუმცა მათ სამინისტროს მოთხოვნების სრულად დაკმაყოფილება ვერ შეძლეს. სწორედ ამიტომ, პროცედურა თავიდან გამოცხადდა.
განათლების სამინისტრომ 25 მაისს სასკოლო ფორმების შესაძენად ბაზრის განმეორებითი კვლევა დაიწყო. პროექტის ბიუჯეტიც გაიზარდა — თავდაპირველად განსაზღვრული 44.9 მილიონი ლარის ნაცვლად, პროგრამისთვის 45.6 მილიონი ლარი გამოიყოფა. საერთო ჯამში სამინისტრო დაახლოებით 1.8 მილიონი ერთეული სასკოლო ფორმის შეძენას გეგმავს.
გივი მიქანაძის განცხადებით, პრიორიტეტი ადგილობრივი წარმოების მხარდაჭერას ენიჭება და ფორმების დამზადება ქართულ კომპანიას დაევალება.
მინისტრმა პარლამენტში გამოსვლისას აღნიშნა, რომ სასკოლო ფორმას მხოლოდ ვიზუალური დანიშნულება არ აქვს და ის მნიშვნელოვან სოციალურ და საგანმანათლებლო ფუნქციასაც ასრულებს. მისი თქმით, ფორმა ხელს უწყობს დისციპლინისა და სასკოლო კულტურის ჩამოყალიბებას, აძლიერებს მოსწავლის კუთვნილების განცდას საკუთარი სკოლის მიმართ და ამცირებს სოციალურ განსხვავებებს მოსწავლეებს შორის.
მისივე შეფასებით, სასკოლო ფორმები ბევრი ოჯახისთვის ყოველდღიური ხარჯების შემცირების შესაძლებლობასაც ქმნის და სკოლაში უფრო მოწესრიგებული და აკადემიური გარემოს ფორმირებას უწყობს ხელს.
როგორც მინისტრმა განმარტა, პროექტის განხორციელების პროცესი რამდენიმე მექანიზმით იქნება კონტროლირებული. მათ შორის გათვალისწინებულია საბანკო გარანტიები, მიწოდების ეტაპობრივი მონიტორინგი, ხარისხის ექსპერტიზა და ადმინისტრაციული ზედამხედველობა.
სამინისტროს გეგმის მიხედვით, ფორმების მიწოდება სამ ეტაპად განხორციელდება. პირველი ეტაპი მოიცავს 301 ათასი ერთეულის მიწოდებას, რომელიც 2026 წლის 25 აგვისტომდე უნდა დასრულდეს. მეორე ეტაპზე, 2026 წლის 15 ოქტომბრამდე, დამატებით 600 ათასი ერთეული ფორმა გაიცემა, ხოლო მესამე ეტაპის ფარგლებში — 2026 წლის 30 ნოემბრამდე — კიდევ 900 ათასი ერთეული უნდა მიეწოდოს სკოლებს.
გივი მიქანაძის თქმით, ამ ეტაპზე სასკოლო ფორმები მხოლოდ 1-6 კლასების მოსწავლეებისთვის იქნება სავალდებულო, თუმცა სამინისტრო მომავალში პროგრამის გაფართოებასაც განიხილავს. მისი განცხადებით, ყოველწლიურად შესაძლოა თითო ახალი კლასი დაემატოს, რათა ფორმის ტარების კულტურა ეტაპობრივად დამკვიდრდეს და პროცესი მოსწავლეებისთვის ბუნებრივად და წინააღმდეგობის გარეშე განვითარდეს.
