განათლების მინისტრი: რეფორმის ფარგლებში არცერთი საგანმანათლებლო პროგრამა არ გაუქმებულა
საქართველოს განათლების, მეცნიერებისა და ახალგაზრდობის მინისტრის, გივი მიქანაძის განცხადებით, უმაღლესი განათლების მიმდინარე რეფორმის ფარგლებში არცერთი საგანმანათლებლო პროგრამა არ გაუქმებულა. ამის შესახებ მინისტრმა პარლამენტში ინტერპელაციის ფორმატში გამოსვლისას ისაუბრა.
მისი განმარტებით, პროგრამების ნაწილი ე.წ. მილევად რეჟიმზე გადავიდა, რაც ნიშნავს, რომ უკვე ჩარიცხული სტუდენტები სწავლას იმავე პირობებით გააგრძელებენ, რა პირობებითაც პროგრამაზე ჩაირიცხნენ.
გივი მიქანაძემ ასევე განმარტა, რომ უნივერსიტეტებთან აქტიური კონსულტაციები მიმდინარეობდა საბაკალავრო და სამაგისტრო პროგრამების ხანგრძლივობასთან დაკავშირებით. მისი თქმით, საკითხი 2026 წლის იანვარში აკაკი წერეთლის სახელმწიფო უნივერსიტეტში გამართულ რექტორთა საბჭოზეც განიხილეს.
მინისტრის განცხადებით, უნივერსიტეტებმა სამინისტროსა და განათლების ხარისხის განვითარების ეროვნულ ცენტრს წერილობითაც მიმართეს საკუთარი პოზიციებით. მიღებული რეკომენდაციებისა და მოსაზრებების ანალიზის შემდეგ განისაზღვრა გამონაკლისები, რომელთა საფუძველზეც სისტემაში დარჩება არანაკლებ 240-კრედიტიანი საბაკალავრო და 120-კრედიტიანი სამაგისტრო პროგრამები.
როგორც მინისტრმა აღნიშნა, განათლების ხარისხის გაუმჯობესების ეროვნული ცენტრი აქტიურ კომუნიკაციაშია უმაღლეს სასწავლებლებთან და პროგრამების მოდიფიცირების პროცესს ზედამხედველობს.
მისივე ინფორმაციით, საბაკალავრო პროგრამებთან დაკავშირებით უნივერსიტეტებისთვის ანგარიშების წარდგენის ვადა პირველ მაისს დასრულდა. ამ ეტაპზე მიმდინარეობს პროგრამების შესაბამისობის შემოწმება სამწლიან მოდელზე გადასვლის მოთხოვნებთან. მინისტრის თქმით, წარმოდგენილი 600 საბაკალავრო პროგრამიდან უკვე დაახლოებით 300 პროგრამის შესაბამისობა დადასტურდა.
გივი მიქანაძის განცხადებით, პროცესი უწყვეტ რეჟიმში გაგრძელდება და მისი დასრულება სასწავლო წლის დაწყებამდე, 1 სექტემბრამდე იგეგმება.
რაც შეეხება სამაგისტრო პროგრამებს, მინისტრის თქმით, უნივერსიტეტებს პირველ ივლისამდე აქვთ ვადა, რათა ცენტრს წარუდგინონ ანგარიშები 1+1 მოდელზე გადასვლასთან დაკავშირებით. მისი შეფასებით, უმაღლესი სასწავლებლები ამ მიმართულებით უკვე აქტიურად მუშაობენ და შესაბამის დოკუმენტაციას ივნისის განმავლობაში წარადგენენ.
