ჯანმრთელობის მსოფლიო ორგანიზაციამ ორი ახალი ინიციატივის განხორციელება დაიწყო, რომელთა მიზანი მხედველობის, სმენისა და დამხმარე ტექნოლოგიების სერვისებზე წვდომის გაფართოებაა.
პროექტების ფარგლებში იგეგმება სკოლებსა და პირველადი ჯანდაცვის სისტემაში მხედველობისა და სმენის სკრინინგის, პაციენტების გადამისამართების (რეფერირების) მექანიზმების ინტეგრირება და აუცილებელ დამხმარე საშუალებებზე (მათ შორის, სათვალეებსა და სმენის აპარატებზე) ხელმისაწვდომობა ტელემედიცინის გამოყენებით.
ინიციატივების გახსნის ღონისძიებაზე შეიკრიბნენ ჯანდაცვის სტრუქტურების, მუნიციპალიტეტებისა და პარტნიორი ორგანიზაციების წარმომადგენლები. განიხილეს საქართველოში ჩატარებული მხედველობისა და სმენის ჯანმრთელობის ეროვნული შეფასებების შედეგები და რეკომენდაციები, იმსჯელეს პრიორიტეტულ ინტერვენციებსა და განხორციელების მიდგომებზე, ასევე, დასახეს პრაქტიკული ნაბიჯები საქართველოს შერჩეულ მუნიციპალიტეტებში ინიციატივების დასანერგად.
მომდევნო თვეების განმავლობაში, ჯანმრთელობის მსოფლიო ორგანიზაცია გადაამზადებს მასწავლებლებს, ექთნებს, სკოლის ექიმებსა და პირველადი ჯანდაცვის დაწესებულებების სამედიცინო პერსონალს, გააძლიერებს მხედველობისა და სმენის სკრინინგისა და რეფერირების სისტემას პირველადი ჯანდაცვისა და სპეციალიზებული მომსახურების დონეებს შორის ტელემედიცინის გამოყენებით; ასევე, ხელს შეუწყობს ეროვნული პოლიტიკის შემუშავებას, რათა გაიზარდოს სერვისების მოცვა და მოწყვლადი ჯგუფების ხელმისაწვდომობა.
ამით გაგრძელდება და კიდევ მეტად განევრცობა WHO-ს მიერ საქართელოში განხორციელებული საქმიანობა, რომელიც რეაბილიტაციისა და დამხმარე ტექნოლოგიების სერვისების გაძლიერებას ემსახურება. განსაკუთრებული ყურადღება კვლავ მომსახურების ხარისხის გაუმჯობესებას, ადამიანური რესურსების შესაძლებლობების განვითარებასა და ხარისხიან სამედიცინო მომსახურებაზე ხელმისაწვდომობის ზრდას დაეთმობა.
გარდა ამისა, ეს ინიციატივა WHO-ს გლობალური SPECS2030 მიმართულების ნაწილია, რომლის მიზანიც რეფრაქტორულ დარღვევების მომსახურებაზე წვდომის გაუმჯობსებაა. პირველადი ჯანდაცვის, ციფრული ინოვაციებისა და დამხმარე ტექნოლოგიების მეშვეობით გაუმჯობესდება აუცილებელ სერვისებზე ხელმისაწვდომობა და გაძლიერდება ადამიანზე ორიენტირებული ჯანდაცვის მოდელი.
