საქართველოს ბიუჯეტის ცვლილებების პროექტის მიხედვით, 2025 წელს საყოველთაო ჯანდაცვის პროგრამა დამატებით 195 მილიონ ლარს მიიღებს.
როგორც ფინანსთა მინისტრის მოადგილემ, გიორგი კაკაურიძემ პარლამენტის კომიტეტურ განხილვაზე აღნიშნა, ამ თანხიდან 25 მილიონი სამინისტროს შიდა რესურსების მობილიზებით იფარება, ხოლო 170 მილიონი ლარი სახელმწიფო ბიუჯეტიდან დაემატება.
კაკაურიძის თქმით, დამატებითი დაფინანსების საჭიროება მას შემდეგ გაჩნდა, რაც პროგრამის 11-თვიანი დანახარჯი უკვე 1.23 მილიარდ ლარს გაუტოლდა – ფაქტობრივად იმავე მოცულობას, რაც 2025 წლისთვის თავდაპირველად იყო გათვალისწინებული. ამიტომ პროგრამის შეუფერხებლად გაგრძელებისთვის სამინისტროს დამატებითი ფინანსური რესურსი დასჭირდა.
2026 წლის ბიუჯეტის საბოლოო ვერსიით, საყოველთაო ჯანდაცვაზე მომავალ წელს 1.5 მილიარდი ლარის გამოყოფა იგეგმება, რაც მიმდინარე წლის გეგმას დაახლოებით 280 მილიონით აღემატება.
გარდა ამისა, წლების განმავლობაში საყოველთაო ჯანდაცვა ჯანდაცვის უწყებისთვის ერთ-ერთ ყველაზე პრობლემურ მიმართულებად რჩებოდა: მოსახლეობის მოთხოვნები ხშირად აჭარბებდა წინასწარ განსაზღვრულ ბიუჯეტს, რის გამოც მთავრობა თითქმის ყოველ წელს იძულებული ხდებოდა პროგრამისთვის მნიშვნელოვანი დამატებითი თანხები გამოეყო.
