“ფიტნეს აკადემიის” დამფუძნებლის, ვალიტა გორელჩანიკის განცხადებით, ფიტნეს ინსტრუქტორის პროფესიის შესწავლის მსურველთა რაოდენობა მკვეთრად გაზრდილია.
First Fitness Academy, პირველი საგანმანათლებლო დაწესებულებაა საქართველოში, რომელიც აკრედიტაციას ფლობს და სხვადასხვა მიმართულებით ფიტნეს ინსტრუქტორის პროფესიას შეასწავლის.
აკადემიის დამფუძნებლის შეფასებით, აკადემიაზე გაზრდილი მოთხოვნა, ბაზარზე ახალი დარბაზების გახსნამ განაპირობა, რის გამოც ფიტნეს დარბაზებში კადრების საჭიროება გაჩნდა. ამასთან, აკადემიამ საზოგადოებაში ცნობიერება აამაღლა და მომხმარებლებს უკვე თავად გაუჩნდათ სერტიფიცირებულ, პროფესიონალ მწვრთნელთან მუშაობის სურვილი.
“აკადემიის გახსნიდან დღემდე 130-მდე ადამიანი გვყავს გადამზადებული. მოთხოვნიდან გამომდინარე, დავამატეთ ახალი სასწავლო პროგრამები. ერთი კურსის ფარგლებში 30 ადამიანს გადავამზადებთ. სანამ დღგ-ს გადამხდელები არ ვიყავით, კურსის ღირებულება 2300 ლარი იყო. თუმცა, მას შემდეგ, რაც დღგ-ს გადახდა დავიწყეთ, ღირებულების 2900 ლარამდე გაზრდა მოგვიწია. გაზრდილი ფასი დაინტერესებულებისთვის დამაბრკოლებელი არ ყოფილა და მოთხოვნა ბაზარზე არ შემცირებულა. თანაც ჩვენ მოქნილი გადახდის სისტემა გვაქვს. ქვეყანაში განვითარებული მოვლენები, ძირითადად ემოციურ ფონზე უფრო აისახა, ვიდრე მათ მსყიდველუნარიანობაზე. ახლა დინამიკა გამოსწორდა და ისევ წამოვიდა აქტივობა.
2025 წლის მეორე ნახევარში ვგეგმავთ ახალი კვალიფიკაციების, ახალი საგანმანათლებლო პროგრამების დამატებას. კერძოდ, სარეაბილიტაციო მიმართულებით. რათა მწვრთნელმა შეძლოს ტრავმირებული მომხმარებლის მკურნალობა“, – ამბობს ვალიტა გორელჩანიკი.
მისივე თქმით, მათი კურსდამთავრებულების 72% დასაქმებულია, რაც დადებით დინამიკაზე მიუთითებს.
აღსანიშნავია, რომ აკადემია სასერტიფიკატო კურსებს პარტნიორობის ფარგლებში ბათუმშიც ატარებს, თუმცა გორელჩანიკი ამბობს, რომ რეგიონებში მოთხოვნა დაბალია, სადაც ძირითადად ისეთი პროფესიების ათვისება ურჩევნიათ, რომელიც სწრაფად ისწავლება და მალევე შეიძლება დასაქმება.
“ვისაც აქვს ინტერესი, თბილისშიც ჩამოდიან. გვქონია შემთხვევა, როდესაც ქუთაისიდან, გორიდან ან ხაშურიდან ჩამოსულან“, – აცხადებს აკადემიის დამფუძნებელი.
“ფიტნეს აკადემია” ბაზარზე 2022 წლიდან ოპერირებს.
