ექიმი და საზოგადოებრივი მაუწყებლის ტელეწამყვანი მარი მალაზონია დიუშენით დაავადებული ბავშვების მშობლების პროტესტს ვიდეო მიმართვით გამოეხმაურა.
მალაზონიას განცხადებით, ყველა ბავშვის უფლებაა, დიაგნოზის განურჩევლად, შესაბამისი მკურნალობა ჩაიტაროს. მისივე თქმით, დიუშენით დაავადებული ბავშვებისთვის წამალი სიცოცხლის შესაძლებლობაა.
“ყველა ბავშვს აქვს უფლება იყოს ჯანმრთელი. ყველა ბავშვს აქვს უფლება მიიღოს განათლება. ყველა ბავშვს აქვს უფლება თავისი ჯანმრთელობისათვის აუცილებელი სერვისი ჰქონდეს და რაც მთავარია, ყველა ბავშვს აქვს უფლება, მიუხედავად დიაგნოზისა, თავისი დაავადების შესაბამისი წამალი ჰქონდეს.
თუ ჩვენ ვსაუბრობთ, მაგალითად, სპინალური კუნთოვანი ატროფიის, დიუშენის სინდრომის შესახებ, ვსაუბრობთ სხვა პრობლემების შესახებ, რატომ სჭირდებათ მათ დახმარება, მედიკამენტი, მხარდაჭერა — ეს არის მხოლოდ და მხოლოდ იმის შესაძლებლობა, რომ არა მარტო ბავშვებმა, არამედ შვილებმა, ოჯახის სხვა წევრებმა და რაც მთავარია, მშობლებმა, რომელთაც უზარმაზარი სხვადასხვა სახის პასუხისმგებლობა აქვთ, იპოვონ ცხოვრებაში აზრი, იპოვონ სიცოცხლის მოტივაცია და ასეთ შემთხვევაში ეს არის არა უბრალოდ წამალი შვილებისთვის, ეს არის წამალი მშობლებისთვის, ეს არის შესაძლებლობა, სიცოცხლის შესაძლებლობა.
ჩვენ როგორ ვუვლით ბავშვებს, ეს არის იმის საუკეთესო მაჩვენებელი, როგორ ვუვლით და როგორი წარმოდგენა გვაქვს საკუთარ მომავალზე,” — განაცხადა მალაზონიამ ვიდეო მიმართვაში.
შეგახსენებთ, 20 აპრილს მიხეილ სარჯველაძემ ბრიფინგზე განაცხადა, რომ „დიუშენის განკურნებაზე პრეტენზიის მქონე მედიკამენტი მსოფლიოში არ არსებობს. არსებობს მედიკამენტები, რომლებსაც აქვთ პრეტენზია დაავადების მიმდინარეობის შენელებაზე. აქვე იმედს გამოვთქვამ, ახლო მომავალში ასეთი მედიკამენტი შეიქმნება“.
დიუშენის კუნთოვანი დისტროფიით დაავადებული ბავშვების მშობლები სახელმწიფოსგან მედიკამენტის უზრუნველყოფას სთხოვენ.
საქართველოს საზოგადოებრივი ჯანდაცვის ინსტიტუტის ხელმძღვანელი, ჯანდაცვის ექსპერტი, პროფესორი გიორგი ფხაკაძე 7 აპრილს სოციალურ ქსელში გამოქვეყნებილ პოსტში წერს, რომ ყველაზე დიდი შეცდომა დღეს არის ის, რომ საზოგადოებას ეუბნებიან მხოლოდ ფასს და „იმედს“, მაგრამ არ ეუბნებიან რისკებს. მედიცინაში რისკის დამალვა — არის ყველაზე დიდი საფრთხე. მთავარი ფაქტი (რაც აუცილებლად უნდა იცოდეს საზოგადოებამ), დიუშენის მკურნალობა არ არის უსაფრთხო, მარტივი ან ერთჯერადი გადაწყვეტილება
