დღეს დაისვა კითხვა შევხვდებით თუ არა აღნიშნული დაავადების მქონე პაციენტების მშობლებს, არასდროს ჩვენი კარი არ დახურულა, ეს მათი არჩევანი იყო, რაც გააკეთეს და მათ მე კრიტიკას ვერ დავუწყებ, – განაცხადა გადაცემაში „დღის ქრონიკა“ ჯანდაცვის მინისტრმა მიხეილ სარჯველაძემ დიუშენის კუნთოვანი დისტროფიის სამკურნალო მედიკამენტების შესახებ საუბრისას.
მისივე თქმით, მუშაობა აუცილებელია, ნებისმიერი საკითხი, რომელიც გადაწყვეტილების მიღებისთვის არის საჭირო და აუცილებელი, უნდა შეისწავლონ და გამოიკვლიონ რაც შეიძლება სწრაფად.
„ღია წყაროებში თუ პირდაპირი კომუნიკაციის გზით ძალიან დიდი ინფორმაციაა დაგროვილი სამინისტროში თითოეული გარემოების შესახებ, რაც თანმხლებია ამ მედიკამენტების ავ-კარგიანობის შეფასებისთვის. ამას სჭირდება კარგად დაკვირვება.
ბუნებრივია, რომ ნორვეგიაშიც უყვართ ბავშვები და ნორვეგიაშიც აქვთ შესაძლებლობა, როგორც ჯანდაცვის მენეჯმენტის მიმართულებით, ისე ფინანსური შესაძლებლობებით და მიუხედავად ამისა, ვერ რისკავენ ასე სწრაფად გადაწყვეტილებების მიღებას ასეთი მედიკამენტების სახელმწიფო პროგრამაში შეტანასთან დაკავშირებით. ეს ნიშნავს იმას, რომ ჩვენი მხრიდანაც გარკვეული თავშეკავება, გარკვეული დროის განმავლობაში, ვიდრე არ გვაქვს პასუხები, არის აბსოლუტურად გონივრული, ნორმალური და პასუხისმგებლობიანი დამოკიდებულება ვითარებასთან მიმართებაში.
როდესაც ვამბობ, რომ მშობლებს ვერ ვაკრიტიკებ, ეს ნიშნავს იმას, რომ მშობლების ემოციური მდგომარეობა და მათი დამოკიდებულება ჩემთვის გასაგებია, მაგრამ არ მესმის და მიმაჩნია, რომ ამორალურია, როდესაც ამით ხელის მოთბობას ცდილობს ან რომელიმე კომერციული სტრუქტურა, ან მიკერძოებული პოლიტიკური ორგანიზაცია.
ძალია დიდი სურვილი მაქვს, რომ რაც შეიძლება სწრაფად ყველაფერი გახდეს ცხადი, ცალსახა და ამის მიხედვით მივიღოთ გადაწყვეტილებები“, – აღნიშნა მიხეილ სარჯველაძემ.
