არის წუთები, როდესაც სამედიცინო ცოდნასთან ერთად, გადამწყვეტი ხდება სისწრაფე, ცივი გონება და გვერდში დგომა.
ამ ისტორიაში ნახავთ, როგორ იქცნენ უცნობი ადამიანები ერთი გუნდის წევრებად კრიტიკულ მომენტში და როგორ შეძლეს ექიმებმა მე-7 სართულზე, რთულ პირობებში, სასწაულის მოხდენა. ეს არის ამბავი პროფესიონალიზმზე, რომელიც ადამიანობითა და თავდადებით იწერება. ისტორიას სოციალურ ქსელში გვერდი „შენი სიცოცხლის გადასარჩენად“ აქვეყნებს
– თბილისის მე-11 რაიონული სამსახურის N1136 ბრიგადამ გამოძახება ლოზუნგით – მშობიარობა მიიღო. სასწრაფო დახმარების ბრიგადა ადგილზე დაახლოებით 5 წუთში მივიდა. ახალგაზრდა ქალს მშობიარობა უკვე დაწყებული ჰქონდა, ამიტომ ექიმი თამარ კაიშაურის თქმით, პაციენტის მდგომარეობის შეფასების შემდეგ, გადაწყვიტეს მშობიარობა ადგილზე მიეღოთ.
რამდენიმე წუთში დაიბადა ჯანმრთელი ბიჭუნა, რომელმაც მომენტალურად იტირა. დედას აღენიშნებოდა სისხლდენა, ჰქონდა ცნობიერების დაბინდვა. ბრიგადის წევრები მიხვდნენ, რომ მდგომარეობის დამძიმების საშიშროება იყო, რის გამოც, შესაბამის მკურნალობასთან ერთად, საჭირო იყო დედის დროული ჰოსპიტალიზაცია.
ვინაიდან, პაციენტი მე-7 სართულზე იმყოფებოდა და მდგომარეობა მოითხოვდა საკაცით ჩაყვანას, საჭირო გახდა დამატებითი დახმარება. თამარ ექიმმა ფანჯრიდან დაინახა, რომ კორპუსის ეზოში ქუჩის სარემონტო სამუშაოები მიმდინარეობდა. ექიმმა სასწრაფოდ დაურეკა ბრიგადის მძღოლს, რათა ქუჩის სამუშაო პროცესში მონაწილე მამაკაცებისთვის დახმარება ეთხოვა.
ცოტა ხანში სახლი ადამიანებით გაივსო – მათი დახმარებით ბრიგადის წევრებმა დედა ახალშობილთან ერთად უსაფრთხოდ მოათავსეს სასწრაფოს მანქანაში და თბილისის ერთ-ერთ კლინიკაში გართულებების გარეშე, სტაბილური მდგომარეობით გადაიყვანეს.
რამდენიმე ხნის შემდეგ, ბავშვის დედა თავად დაუკავშირდა ექიმ თამარ კაიშაურს და მადლობა გადაუხადა მისი და პატარას გადარჩენილი სიცოცხლისთვის. აღსანიშნავია, რომ ახალგაზრდა დედისთვის ეს მეოთხე მშობიარობა გახლდათ და მისი გულწრფელი მადლობა 1136 ბრიგადის თითოეულ წევრს ეკუთვნის.
თამარ ექიმი განსაკუთრებული სიამაყით ახსენებს ბრიგადის წევრების პროფესიონალიზმს:
ექთანს – ელზა ნოვრუზოვას
მძღოლს – ზვიად ჯაყელს
მათი გულისხმიერების, სისწრაფისა და გუნდურობის წყალობით, ამ ისტორიას ბედნიერი დასასრული ჰქონდა.
