ეს ბატონი 67 წლის მიხეილ ვიშნიაკოვია, რომელსაც ცოტა ხნის წინ მასშტაბური განმეორებითი ოპერაცია მოზრდილთა კარდიოქირურგებმა არტურ ლემონჯავამ და ავთანდილ ცინცაძემ გაუკეთეს.
ბატონ მიხეილს გულზე ოპერაცია 1997 წელს, სანკტ-პეტერბურგში ჰქონდა გაკეთებული. კერძოდ, მაშინ მას ჩაუტარდა აორტის სარქვლის პროთეზირება მექანიკური სარქვლით და მიტრალური სარქვლის პლასტიკა.
ჯო ენის საუნივერსიტეტო ჰოსპიტალში ჩატარებული კვლევების საფუძველზე დაესვა დიაგნოზი: აღმავალი აორტის ანევრიზმა, მიტრალური სარქვლის ნაკლოვანება, სამკარიანი სარქვლის ნაკლოვანება, აორტის პოზიციაში არსებული მექანიკური სარქველი.
პაციენტი საჭიროებდა მასშტაბურ განმეორებით ოპერაციას. აორტის პოზიციაში არსებული მექანიკური სარქვლის პროთეზირების საჭიროების შემთხვევაში, პაციენტის სურვილი იყო, შეცვლილიყო ბიოლოგიური სარქვლით.
პაციენტს წარმატებით ჩაუტარდა საკმაოდ მასშტაბური და ხანგრძლივი ოპერაცია – მიტრალური სარქვლის პლასტიკა, აორტის რგოლის გაფართოება, აორტის სარქვლის რეპროთეზირება ბიოლოგიური სარქვლით, აღმავალი აორტის ანევრიზმის რეზექცია და პროთეზირება ხელოვნური სისხლძარღვოვანი პროთეზით, სამკარიანი სარქვლის პლასტიკა.
ოპერაციამ და პოსტოპერაციულმა პერიოდმა ჩაიარა გართულებების გარეშე. პაციენტი ამჟამად თავს გრძნობს კარგად.
