მენტორების კვალიფიკაციის მნიშვნელობა პროფესიული მომზადების და გადამზადების მიმართულებით ძალზე მნიშვნელოვანია.
განსაკუთრებით – ფიტნესის სექტორში. ეს ეხება სხვადასხვა ფიტნეს დარბაზში დასაქმებულ მწვრთნელებსაც, რომლებიც პასუხისმგებელნი არიან არა მხოლოდ მომხმარებლის შედეგზე, არამედ მათ ჯანმრთელობაზეც, შესაბამისად, მათი განათლების ხარისხი ძალიან მნიშვნელოვანია. ფიტნესი საქართველოსთვის ჯერ კიდევ ახალი მიმართულებაა, მაგრამ, ამის მიუხედავად, მას ბევრი მიმდევარი ჰყავს.
იხსნება ახალი ფიტნეს კლუბები, მოთხოვნა ფიტნეს ინსტრუქტორებზე იზრდება. შესაბამისად, გაჩნდა საგანმანათლებლო დაწესებულებების შექმნის საჭიროება, სადაც ნებისმიერი მსურველი, გარკვეული წინაპირობის დაკმაყოფილების შემთხვევაში, შეძლებს განათლების მიღებას იმისთვის, რომ თავისი ჰობი პროფესიად აქციოს. “ახალგამომცხვარ“ ფიტნეს აკადემიებში კვალიფიციურ მენტორებზე მოთხოვნა ასევე იზრდება, მაგრამ, მოდით, გავერკვეთ, თუ რა არის “კვალიფიკაცია”: იქიდან გამომდინარე, რომ მომავალმა მწვრთნელმა უნდა იცოდეს სპორტის ფიზიოლოგია, ადამიანის ორგანიზმში მიმდინარე ბიოქიმიური პროცესები, აქტიური და პასიური აპარატების ფუნქციები, მოძრაობის ბიომექანიკა, ნუტრიციოლოგია და ასე შემდეგ, ყველა ეს თემა საჭიროებს დარგის სპეციალისტს. წარმოიდგინეთ, რომ თქვენ მოხვდით სასწავლებელში, სადაც ათ სხვადასხვა დისციპლინას/თემას კითხულობს ერთი ან ორი ადამიანი (ისტორიას, ფიზიკას, მედიცინას და სპორტულ ფსიქოლოგიას, რომელიც თითქმის ყველა აკადემიის ჩამონათვალში შეგხვდებათ, იმის მიუხედავად, რომ სპორტული ფსიქოლოგიის სპეციალისტები თითზე ჩამოსათვლელი გვყავს).
ალბათ დაგებადებათ კითხვა, თუ რამდენად კომპეტენტურია თქვენი მენტორი/ლექტორი. როგორც უკვე გითხარით, საჭიროა მენტორის/ლექტორის კვალიფიკაციის არსებობა და არამხოლოდ მისი პრაქტიკული გამოცდილების ინტეგრირება სასწავლო პროცესში.
გარდა ამისა, მას უნდა ჰქონდეს მიღებული აკადემიური ცოდნა. დავუშვათ, ესპანეთში მენტორს/ლექტორს, რომელიც კითხულობს ლექციებს ერთ ან, მაქსიმუმ, ორ დისციპლინაში, მენტორის სტატუსის მოსაპოვებლად გავლილი აქვს 800საათი დამატებითი დრო ძირითადი განათლების კვალიფიკაციის ასამაღლებლად. ევროპაში ამ ყველაფერს არეგულირებენ ისეთი ორგანიზაციები, როგორიცაა, Europa sdandarts და Accréditation Sans Frontières, Public Health Institute. საქართველოში სულ მალე შემოვა ეს სტანდარტები, რომლებიც დაარეგულირებს როგორც აკადემიების, ისე ფიტნეს კლუბების მუშაობის ხარისხს. მაგრამ, სანამ ეს მოხდება, იყავით გაცნობიერებულნი სასწავლებლის შერჩევისას, თუ ეს სასწავლებელი არის არა სპორტის უნივერსიტეტი, არამედ პროფესიული მომზადება/გადამზადების მოკლევადიანი კურსი, მოითხოვეთ მენტორების კომპეტენციის დამადასტურებელი საბუთი:
1. უმაღლესი განათლება (სპორტის ან მედიცინის მიმართულებით).
2. თუ თქვენს მენტორს არ აქვს უმაღლესი განათლება, მოითხოვეთ საერთაშორისო მარეგულირებელი ორგანიზაციებით აღიარებული ფიტნეს ექსპერტის ან ქოუჩის დამადასტურებელი საბუთი.
3. 8-12 თემისგან შემდგარ საგანმანათლებლო პროგრამას უნდა კითხულობდეს შესაბამისი კომპეტენციის მქონე სხვადასხვა მენტორი.
