საქართველოს ადვოკატთა ასოციაციის წევრი, საერთო სპეციალიზაციის ადვოკატი, სამართალმცოდნეობის ფაკულტეტის მაგისტრი, დოქტორანტი, ნინო ენდელაძე ხარისხიანი და ეფექტური სამედიცინო მომსახურების სისტემის შექმნისთვის გვიზიარებს ამერიკულ გამოცდილებას და რეკომენდაციებს:
,,ჩვენი საკანონმდებლო რეგულაციის მთავარ მიმართულებას წარმოადგენს სამედიცინო საქმიანობის ხარისხის გაუმჯობესება საერთაშორისო აკრედიტაციის გზით, აქედან გამომდინარე სწორი იქნება, თუ ამ სფეროში წარმატებული და განვითარებული ქვეყნების მაგალითს გავიზიარებთ.
ამერიკის სამედიცინო ასოციაცია (American Medical Association) დაარსებულია 1847 წელს, ის ყველაზე დიდი და ერთადერთი ეროვნული ასოციაციაა, რომელიც აერთიანებს 190-ზე მეტ სახელმწიფო, სამედიცინო პროფესიულ ასოციაციებს და სხვა დაინტერესებულ მხარეებს. ისტორიის მანძილზე, (American Medical Association) ყოველთვის ხელს უწყობდა მედიცინის, მეცნიერების და საზოგადოებრივი ჯანმრთელობის გაუმჯობესებას.
ამერიკის სამედიცინო ასოციაცია, (American Medical Association) როგორც ექიმების ძლიერი მოკავშირე პაციენტთა მოვლაში, მთელი ქვეყნის მასშტაბით ექიმებს სასამართლოებსა და საკანონმდებლო ორგანოებში წარმოადგენს, აღმოფხვრის დაბრკოლებებს, რომლებიც ხელს უშლის პაციენტის მოვლას, რაც იწვევს ქრონიკული დაავადებების პრევენციას და საზოგადოებასთან დაპირისპირებას.
აგრეთვე ახორციელებს, ჯანმრთელობის მართვის კრიზისების და მედიცინის სისტემის განვითარებისთვის მუდმივ შეფასებას, გამოვლენას და აღმოფხვრას. (https://www.ama-assn.org/).
ამ ასოციაციის მრვალწლიანი წარმატებული საქმიანობის გათვალისწინებით, ,,შენი უფლებების’’ ფარგლებში სამედიცინო და სამოქალაქო სექტორის განვითარების, გაძლიერებისა და ხარისხიანი სამედიცინო მომსახურების მიწოდებისთვის რვა რეკომენდაციას გთავაზობთ, რომელიც დაიცავს მედ-პერსონალს სამედიცინო საქმიანობის განხორციელების პროცესში.
საერთაშორისო ხარისხის ჯანდაცვის სექტორის შექმნისთვის აუცილებელია:
- სამედიცინო პროფესიული ასოციაციების საქმიანობის გაძლიერება და მათი სავალდებულო ჩართულობა სამედიცინო გაიდლაინების და პროტოკოლების შემუშავებაში.
- სამინისტროს დაქვემდებარებაში არსებული სამედიცინო მედიაციის სამსახურის შექმნა, რომელიც სამედიცინო დავებს განიხილავს, რაც ადმინისტრაციული წარმოების ეტაპზე დავების გადაწყვეტას შეუწყობს ხელს, რითაც შემცირდება სასამართლო დავების რაოდენობა.
- სამედიცინო პერსონალის პასუხისმგებლობის დაზღვევის სავალდებულობა და ამ მიმართულებით დაზღვევის ფუნქციების გაზრდა, როგორც საკონსულტაციო ისე საპროცესო დონეზე.
- სახელმწიფოს მხრიდან, სხვადასხვა საკანონმდებლო აქტების მიღების პროცესში სამედიცინო სექტორის აქტიური ჩართულობა, მათ შორის საექსპერტო დონეზე.
- სახელმწიფო დაქვემდებარებაში ექიმ ექსპერტ-სპეციალისტთა საბჭოს შექმნა, დამოუკიდებელი ან სახელმწიფო ბიუჯეტის ფარგლებში, რაც კონკრეტული სამედიცინო შემთხვევის ან/და გადაცდომის დროს საექსპერტო დასკვნის შემუშავების პროცესს გაამარტივებს.
- მედ-პერსონალის წინააღმდეგ შეტანილი საჩივრების პროცედურის გაწერა მათ შორის, მტკიცებულებების წარდგენის წესის განსაზღვრა, მოსარჩელეების მტკიცების ტვირთის გაზრდა და არასწორი გადაწყვეტილების მიღების ალბათობას მინიმუმამდე დაიყვანის მიზნით, მისი დასაშვებობის შემოწმება.
- საჩივრის განხილვის დოკუმენტაციის კონფიდენციალურად შენახვა იქამდე სანამ შემთხვევაზე წინასწარი, შუალედური ან საბოლოო გადაწყვეტილება არ იქნება მიღებული და მათ შორის პირ(ებ)ის პერსონალური მონაცემების ხელშეუხებლობა არ იქნება სათანადოდ გათვალისწინებული.
- საზოგადოების ცნობიერების ამაღლების მიზნით, ადამიანის სიცოცხლისა და ჯანმრთელობისათვის საფრთხის შექმნის კატეგორიის სიხლის სამართლის საქმეები, აგრეთვე ადმინისტრაციული გადაცდომის შედეგად მედ-პერსონალის ლიცენზირების საკითხის განხილვა დაექვემდებაროს ნაფიც მსაჯულთა სასამართლოს. (https://tcc.court.ge/ka/Jurors)’’.
შენი კანონი:
,,1. საექიმო საქმიანობის განხორციელებისას ექიმისათვის, სხვა სამედიცინო პერსონალისა და სამედიცინო დაწესებულებისათვის მიყენებულ ფიზიკურ თუ მატერიალურ ზიანს საქართველოს კანონმდებლობით დადგენილი წესით აანაზღაურებს ზიანის მიმყენებელი.
- ექიმს უფლება აქვს სასამართლოს მეშვეობით, კანონით დადგენილი წესით დაიცვას საკუთარი პატივი, ღირსება, პირადი ცხოვრების საიდუმლოება, პირადი ხელშეუხებლობა ან საქმიანი რეპუტაცია შელახვისაგან.
- ექიმის მიმართ პაციენტის ან მისი ახლობლის საჩივარი სამინისტროს შესაბამისი საბჭოს მიერ განხილვამდე დასკვნისათვის საქართველოს კანონმდებლობით დადგენილი წესით გადაეცემა ექიმთა შესაბამის პროფესიულ ასოციაციას (ასოციაციებს).’’ (წყარო საქართველოს კანონი ,,საექიმო საქმიანობის შესახებ’’ მუხლი94.)
