2024 წლის 26 მარტს “აკრედიტაცია კანადას” წარმომადგენლობის ოფიციალური შეხვედრა გაიმართა კლინიკა “კონსილიუმ მედულაში”.
“აკრედიტაცია კანადა”, რომლის წარმომადგენელი საქართველოში ჯანდაცვის საერთაშორისო ექსპერტი, პროფესორი გიორგი ფხაკაძეა, საქართველოს 20-ზე მეტი კლინიკის აკრედიტაციის პროცესშია ჩართული. ამჟამად “აკრედიტაცია კანადას” წარმომადგენლები გიორგი ფხაკაძის ხელმძღვანელობით საქართველოში იმყოფებიან და კლინიკებთან შეხვედრებს მართავენ.
ნაყოფიერი შეხვედრის შემდეგ “შენი პულსი” კლინიკა “კონსილიუმ მედულას” დირექტორს ნიკოლოზ ფრუიძეს ესაუბრა:
“მიმაჩნია, რომ ხარისხი არის ის ძირითადი და მთავარი რამ, რისი კონტროლიც სახელმწიფოს პრეროგატივაა. ქვეყანაში ხარისხის მაღალი სტანდარტის უზრუნველყოფა ხელისუფლების ვალდებულებაა.
ხარისხის კონტროლი სხვადასხვაგვარად შეიძლება განხორციელდეს: შესყიდვით, სხვადასხვა პროფესიული ასოციაციებისა და დარგის ექსპერტების მეშვეობით, მაგრამ მთავარია, ქვეყანაში არსებობდეს მოთხოვნა ხარისხის მაღალი სტანდარტის დაცვაზე. მივესალმები, რომ დღის წესრიგში დადგა სამედიცინო დაწესებულებების, კლინიკების ხარისხის კონტროლის საკითხი. რაც შეეხება აკრედიტაციას, ეს ერთ-ერთი მოქმედი ბერკეტია, რომელიც მსოფლიოს სხვადასხვა ქვეყანაში ეფექტიანად მუშაობს და ჩვენც აუცილებლად უნდა დავნერგოთ.
არ მგონია, რომ ერთიანად, ერთსა და იმავე დროს აკრედიტაციის გავლა ყველამ შეძლოს, მაგრამ ეტაპობრივად ყველაფერი შესაძლებელია. ამისათვის სხვადასხვა მიდგომა არსებობს, საჭიროა გადავხედოთ საერთაშორისო გამოცდილებას და საუკეთესო მეთოდის ინტერპოლირება მოვახდინოთ. ჩვენი კლინიკა ერთი წელია, რაც თანამშრომლობს “აკრედიტაცია კანადასთან” და უკვე საკმაოდ კარგი შედეგი მივიღეთ. ჩვენ თავადვე ვხედავთ, როგორი პროგრესი გვაქვს ამ გზაზე.
პროფესიონალები, რომლებიც გვეხმარებიან ხარისხის სისტემის დანერგვაში და შემდგომ, საბოლოო მიზნის მიღწევაში, აკრედიტაციის გავლაში დიდი გამოცდილების მქონე ექსპერტები არიან. მთელი ჩვენი გუნდი, ექიმებიც და მედპერსონალიც აქტიურად ვართ ჩართული ამ პროცესში, იმედი გვაქვს, რომ არამარტო ფორმალურად გავივლით აკრედიტაციას, არამედ სწორედ აკრედიტაცია იქნება ისეთი მაღალი სტანდარტის ხარისხის ვალიდაცია, როგორიც გვინდა ჰქონდეს კლინიკა “კონსილიუმ მედულას”.
მასალის გამოყენების პირობები
