პროკურატურა გიორგი გახარიას მიმართ აღკვეთის ღონისძიების სახით პატიმრობის შეფარდების შუამდგომლობით თბილისის საქალაქო სასამართლოს კანონით დადგენილ ვადაში მიმართავს. ადვოკატები გუშინ საღამოს პროკურატურაში იმყოფებოდნენ, სადაც მათ საქმის მასალები გადასცეს. საგამოძიებო ორგანოდან გამოსულმა ადვოკატმა ბერდია სიჭინავამ ჟურნალისტებს განუცხადა, რომ გახარია ბრალს არ აღიარებს.
გიორგი გახარიას პროკურატურამ ბრალი ორ საქმეზე წაუყენა. მოქალაქეთათვის ჯანმრთელობის განზრახ დაზიანების ორგანიზება – 20 ივნისის საქმეზე პროკურატურამ გიორგი გახარიას ბრალეულობა დაადგინა.
მეორე ეპიზოდი კი სამსახურებრივი უფლებამოსილების გადამეტებას ეხება. პროკურატურის ცნობით, 2019 წელს გიორგი გახარიამ საოკუპაციო ხაზის გასწვრივ, სოფელ ჩორჩანასთან დამატებითი საპოლიციო საგუშაგოს აღმართვის შესახებ ერთპიროვნულად მიიღო გადაწყვეტილება, რასაც ოკუპანტების მხრიდან რამდენიმე საგუშაგოს გახსნა და 1 მილიონი კვადრატული მიწის ოკუპაცია მოჰყვა. მტრულ საქმიანობაში დახმარებისა და საბოტაჟის მცდელობის საქმის ფარგლებში არაერთი მოწმე გამოიკითხა. ბრალის დამტკიცების შემთხვევაში, ყოფილ პრემიერს გიორგი გახარიას 13 წლამდე თავისუფლების აღკვეთა ემუქრება. ის ამჟამად გერმანიაშია გაქცეული.
