ფორმის არსებობა პირველ რიგში არის ასოცირება სკოლასთან, მეორე – თანასწორობის პრინციპს უზრუნველყოფს და ამავდროულად ესთეტიკურადაც ძალიან ლამაზია, – განაცხადა გადაცემაში „იმედის კვირა“ განათლების, მეცნიერებისა და ახალგაზრდობის მინისტრმა გივი მიქანაძემ ზოგადი განათლების რეფორმაზე საუბრისას.
რეფორმის თანახმად, პირველიდან მეექვსე კლასის ჩათვლით სავალდებულო ხდება სასკოლო ფორმები.
„ფორმის არსებობა, პირველ რიგში, არის ასოცირება სკოლასთან. მეორე – არის ის, რომ თანასწორობის პრინციპს უზრუნველყოფს და ამავდროულად ესთეტიკურადაც ძალიან ლამაზია. ამასთან, ჩვენ ბავშვებს კულტურას, წესრიგს ვაჩვევთ, რომელიც მნიშვნელოვანია მათი განვითარებისთვის“, – განმარტავს მინისტრის.
რეფორმის მიხედვით, სახელმწიფო აიღებს თავის წილ პასუხისმგებლობას და სოციალურად დაუცველი ოჯახების ბავშვებს ფორმებს თავად დააფინანსებს.
კიდევ ერთი სიახლე სახელმძღვანელოებს ეხება. ყველა – როგორც საჯარო, ასევე კერძო სკოლაში საგნებს ერთიანი, სამინისტროს მიერ შექმნილი სახელმძღვანელოებით ასწავლიან.
„ერთ სკოლაში ერთი სახელმძღვანელოთი ისწავლება, მეორე სკოლაში – მეორით. ამასთანავე, სახელმძღვანელოების ნაწილში ჩვენ დავინახეთ, რომ ისინი ბოლომდე ვერ პასუხობენ იმ მზაობას, რაც მათ აკავშირებს ეროვნული გამოცდების მასალასთან, არ არის სიღრმისეული, რიგ შემთხვევებში არის ფრაგმენტული. ასეთი აღრევა იმ შედეგს ვერ გვაძლევს, რომელიც ხარისხიანი განათლების მიცემაზეა ორიენტირებული. ჩვენ შემდგომი 2-3 წლის განმავლობაში ახალ სახელმძღვანელოებს შევიმუშავებთ, პილოტირების რეჟიმში გადავიტანთ, დავხვეწავთ, გავაუმჯობესებთ და საბოლოო ჯამში შევიტანთ“, – განაცხადა განათლების, მეცნიერებისა და ახალგაზრდობის მინისტრმა.
გადმოწერე აპლიკაცია „შენი ექიმი“ – პირველი ქართული სამედიცინო პლატფორმა!
iPhone: https://apps.apple.com/fr/app/sheni/id6746877342?l=en-GB
Telegram არხი: https://t.me/SheniEkimi
