ჯანდაცვის მინისტრის, მიხეილ სარჯველაძის ინფორმაციით, დიუშენის კუნთოვანი დისტროფიის სამკურნალო მედიკამენტ „ჯივინოსტატის“ შეძენის შესახებ ხელშეკრულება გაფორმდა.
მისივე თქმით, საქართველო მსოფლიოში ერთ-ერთი პირველი ქვეყანა იქნება, რომელიც ამ მედიკამენტს შეიძენს და შეიტანს დაავადების მართვის სახელმწიფო პროგრამაში.
“დიუშენის კუნთოვანი დისტროფიის მედიკამენტთან დაკავშირებით მინდა გაცნობოთ, რომ დღეს წარმატებით დასრულდა მოლაპარაკებები იტალიურ კომპანიასთან, რომელთანაც გაფორმდა ხელშეკრულება მედიკამენტ „ჯივინოსტატის“ შეძენის შესახებ.
ეს მედიკამენტი განკუთვნილია დიუშენის კუნთოვანი დისტროფიის პაციენტებისთვის 6 წლის ასაკიდან გადაადგილების უნარის შენარჩუნებამდე. საქართველო მსოფლიოში ერთ-ერთი პირველი ქვეყანა იქნება, რომელიც ამ მედიკამენტს შეიძენს და შეიტანს დაავადების მართვის სახელმწიფო პროგრამაში“,- აღნიშნა მინისტრმა.
ამასთან, მინისტრი დასძენს, რომ პარალელურად გრძელდება მოლაპარაკებები დიუშენის კუნთოვანი დისტროფიის სამკურნალო კიდევ ერთი მედიკამენტის შემოტანის თაობაზე.
„რაც შეეხება მეორე მედიკამენტს, რომელზეც ადრე იყო საუბარი, მინდა აღვნიშნო, რომ მოლაპარაკებები რამდენიმე მიმართულებით კვლავ გრძელდება და ვიმედოვნებთ, რომ უახლოეს მომავალში, წარმატებით დასრულება, რასთან დაკავშირებითაც მოსახლეობას ინფორმაციას გავუზიარებთ”,- აღნიშნა სარჯველაძემ.
მინისტრმა მედიასთან განმარტა, რომ “ჯივინოსტატი” “საკმაოდ ძვირადღირებული” მედიკამენტია.
“არასდროს ყოფილა ნათქვამი, რომ ფინანსური ბარიერი შეიძლება წარმოადგენდეს წინაღობას ამ გადაწყვეტილების მიღებისთვის. სხვათა შორის, უნდა ვთქვა, რომ ძალიან ბევრი ცდილობდა ასე წარმოეჩინა, მაგრამ ყოველთვის ხაზგასმით აღინიშნებოდა ჩვენს მიერ, რომ ფინანსური ფაქტორი არ განიხილებოდა, როგორც წინაღობა, დამაბრკოლებელი ფაქტორი ამ მედიკამენტის შეძენისთვის”, – განაცხადა სარჯველაძემ.
მინისტრმა არ დააკონკრეტა, თუ რა უჯდება მედიკამენტ “ჯივინოსტატის” შეძენა სახელმწიფოს.
“რაც შეეხება საკითხს, რამდენი დაუჯდება სახელმწიფოს, მე ამაზე არ ვარ უფლებამოსილი, რომ პასუხი გაგცეთ. ამას ითვალისწინებს, მათ შორის ის სამართლებრივი ჩარჩო, რომლის მეშვეობითაც იქნა შეძენილი ეს მედიკამენტი, ასეა განსაზღვრული კანონმდებლობით, რომლითაც გათვალისწინებულია ინოვაციური მედიკამენტების შეძენის შესაძლებლობა ქართული კანონმდებლობის მიხედვით, როგორც ბევრ სხვა ევროპულ სახელმწიფოს გააჩნია. ამის მიხედვით გათვალისწინებულია კონფიდენციალურობის დაცვის ვალდებულება, მათ შორის ყველა კომერციულ საკითხთან დაკავშირებით. ეს ვალდებულება ჩვენც აღებული გვაქვს, ასეთია მოთხოვნა, რომელიც მწარმოებელ კომპანიებს აქვთ. აქედან გამომდინარე, მე ამაზე უფლებამოსილი არ ვარ. საზოგადოებას კარგად მოეხსენება, რომ იაფი წამალი ნამდვილად არ არის, ძვირადღირებული მედიკამენტია, თუმცა კიდევ ერთხელ ვიმეორებ, ეს არ განიხილებოდა და არც განიხილებოდა ჩვენს მიერ, როგორც წინაღობა ამ გადაწყვეტილების მიღებისთვის”, – განაცხადა სარჯველაძემ.
ჯანდაცვის მინისტრის განმარტებით, ”ჯივინოსტატის” ის დოზა შემოვა ქვეყანაში, რაც აუცილებელი იქნება ყველა პაციენტის მომსახურებისთვის”.
