ჯანდაცვის მინისტრი უარყოფს ოპოზიციის მიერ გავრცელებულ ინფორმაციას, თითქოს გამჭვირვალობის კანონის მიღების შემდეგ ონკოპაციენტი ბავშვების საზღვარგარეთ მკურნალობას საფრთხე ემუქრება. მიხეილ სარჯველაძე განმარტავს, რომ მკურნალობა ქვეყნის ბიუჯეტიდან ფინანსდება და შესაბამისად, კანონს სახელმწიფო პროგრამასთან არანაირი კავშირი არ აქვს.
„ქრონიკა“ ესპანეთში ერთ-ერთი წამყვანი კლინიკის ხელმძღვანელს ესაუბრა, რომელიც აცხადებს, რომ საქართველო პირველი ქვეყანაა, რომელმაც მათ საჯარო ტენდერით მიმართა.
„საქართველო იყო პირველი ქვეყანა, ვინც მოგვმართა საჯარო ტენდერით, რათა ქართველი ბავშვებისთვის შეეთავაზებინა უახლესი ტექნოლოგია. დავიწყეთ გასულ წელს და ძალიან კარგი იყო საქართველოს მთავრობასთან მუშაობა. ამ დრომდე 7 ბავშვს ვმკურნალობთ. შეთანხმების გაფორმებამდე საქართველოდან ორ ბავშვს ვმკურნალობდით, თუმცა მთავრობასთან თანამშრომლობით ახლა უფრო მეტი ოჯახი გვყავს საქართველოდან. ქართველი ბავშვების ჯანმრთელობაც უმჯობესდება. ისინი ძალიან მადლიერები უნდა იყვნენ საქართველოს მთავრობის, რომ ესპანეთში გადმოამისამართეს და იფიქრეს ასეთ ინიციატივაზე“, – აღნიშნა Quironslud-ის საერთაშორისო ხელმძღვანელმა მონიკა ფიგეროლამ „ქრონიკასთან“.
