მარიამ პეტრიაშვილი

მედიცინის დოქტორი, ნეონატოლოგი და პედიატრი მარიამ პეტრიაშვილი დაიბადა 1968 წლის 6 ივლისს, ქალაქ თელავში. 1985 წელს ოქროს მედალზე დაამთავრა თელავის N1 საშუალო სკოლა, ხოლო 1992 წელს წარჩინებით დაასრულა თბილისის სახელმწიფო სამედიცინო ინსტიტუტის პედიატრიული ფაკულტეტი. სამედიცინო განათლების პარალელურად, 1994 წელს წარმატებით დაამთავრა ილია ჭავჭავაძის სახელობის უცხო ენათა პედაგოგიური ინსტიტუტის ინგლისური ენის ფაკულტეტი. მარიამ პეტრიაშვილმა პროფესიული საქმიანობა იაშვილის სახელობის ბავშვთა ცენტრალურ საავადმყოფოში ინტერნატურის კურსის გავლით დაიწყო. წლების განმავლობაში იგი ხელმძღვანელობდა თელავის სამშობიარო სახლის ახალშობილთა განყოფილებას, ხოლო 2006 წლიდან დღემდე მუშაობს „ჩაჩავას კლინიკაში“ ნეონატოლოგად და პედიატრად. მისი პროფესიული კვალიფიკაცია მოიცავს მრავალწლიან საერთაშორისო გამოცდილებასა და სტაჟირებებს აშშ-ის (სან-ფრანცისკო), ჰარვარდის, ავსტრიის (გრაცი, ზალცბურგი), ვენისა და ისრაელის შიბას სამედიცინო და საზოგადოებრივი ჯანდაცვის სკოლის წამყვან კლინიკურ - აკადემიურ ცენტრებში. ამავე დროს გავლილი აქვს სტაჟირებები და ტრენინგები საკლერის სამედიცინო უნივერსიტეტში. პრაქტიკულ საქმიანობასთან ერთად, მარიამ პეტრიაშვილი აქტიურად არის ჩართული დარგობრივ საქმიანობაში. 2012 წლიდან გახლავთ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს პერინატალური რეგიონალიზაციის ექსპერტი და საბჭოს წევრი, 8 ეროვნული ნეონატალური პროტოკოლის თანაავტორი. პერინატალური ჯანმრთელობის გაუმჯობესებაში შეტანილი განსაკუთრებული წვლილისთვის 2018 წელს დაჯილდოვდა სამინისტროს მადლობის სიგელით. მარიამ პეტრიაშვილი არის საქართველოს ნეონატოლოგთა და პედიატრთა ასოციაციების, ასევე ევროპის ნეონატოლოგთა და პერინატოლოგთა ასოციაციების კავშირის (UENPS) წევრი. იგი ეწევა აქტიურ პედაგოგიურ საქმიანობას, ატარებს ტრენინგებსა და ლექციებს ექიმებისა და მშობლებისთვის, არის სამეცნიერო სტატიებისა და პუბლიკაციების ავტორი. ჰყავს მეუღლე და ორი ვაჟი.

რა არის კარგი ექიმი?
გულისხმიერება და პროფესიონალიზმი ყველა პროფესიას უნდა სდევდეს თან, მით უმეტეს - ექიმობას. შრომისმოყვარეობა, ადამიანების სიყვარული, პაციენტის ტკივილისა თუ პრობლემის გულთან ახლოს მიტანის უნარი. ყველაფერი უნდა გააკეთო იმისთვის, რომ ავადმყოფს როგორმე დაეხმარო და თუ ვერ განკურნავ, არ ავნო მაინც, სწორი მიმართულება მისცე და დააკვალიანო.

რატომ აირჩიეთ მედიცინა?
კონკრეტულ მოვლენას ვერ გამოვყოფ. გააზრებულად მინდოდა ექიმობა.

ვინ არის თქვენი მისაბაძი?
იდეალი... არ ვიცი, რამდენად შემიძლია ასე ვთქვა, დიახ, მყავს - ეს მამაჩემია, ჯიმშერ პეტრიაშვილი.

რჩევა მომავალ ექიმებს
მომავალ ექიმებს ვეტყოდი, რომ ჩვენი გზა რთულია. ჩვენს პროფესიაში სწავლა არ მთავრდება - სულ განახლება, შრომა, დაუზარებლობა და საკუთარი თავისადმი მომთხოვნელობა აუცილებელია.

განათლება

დაამთავრა თელავის N1 საშუალო სკოლა, ხოლო 1992 წელს წარჩინებით დაასრულა თბილისის სახელმწიფო სამედიცინო ინსტიტუტის პედიატრიული ფაკულტეტი. დაამთავრა ილია ჭავჭავაძის სახელობის უცხო ენათა პედაგოგიური ინსტიტუტის ინგლისური ენის ფაკულტეტი.

სამუშაო ადგილი

გაგუას კლინიკა