ბათუმის შოთა რუსთაველის სახელმწიფო უნივერსიტეტსა და Georgian Medical Journal-ს შორის სტრატეგიული თანამშრომლობის პერსპექტივები განიხილეს
ბათუმის შოთა რუსთაველის სახელმწიფო უნივერსიტეტში გაიმართა საქმიანი შეხვედრა უნივერსიტეტის რექტორთან, პროფესორ ტიტე აროშიძესთან, საბუნებისმეტყველო მეცნიერებათა და ჯანდაცვის ფაკულტეტის დეკანთან, პროფესორ რუსუდან ხუხუნაიშვილთან, პროფესორ სალომე ღლონტთან და პროფესორ გიორგი ფხაკაძესთან — Georgian Medical Journal (GMJ)-ის მთავარი რედაქტორთან, საქართველოს საზოგადოებრივი ჯანდაცვის ინსტიტუტის (PHIG) თავმჯდომარესთან და დავით ტვილდიანის სამედიცინო უნივერსიტეტის საზოგადოებრივი ჯანდაცვის პროფესორთან.
შეხვედრის ფარგლებში წარმოდგენილი იქნა Georgian Medical Journal-ის ეკოსისტემა, რომელიც მოიცავს:
* Georgian Medical Journal (GMJ) — საერთაშორისო, რეცენზირებად სამეცნიერო ჟურნალს;
* GMJ News — მტკიცებულებებზე დაფუძნებულ საინფორმაციო პლატფორმას მედიცინის, საზოგადოებრივი ჯანმრთელობის, მეცნიერებისა და ჯანდაცვის სფეროში მიმდინარე მნიშვნელოვანი მოვლენების გასაშუქებლად;
* GMJ Academy — უწყვეტი პროფესიული განვითარების (CPD) და ელექტრონული სწავლების (e-Learning) თანამედროვე საგანმანათლებლო პლატფორმას.
შეხვედრის მთავარი თემა იყო ბათუმის შოთა რუსთაველის სახელმწიფო უნივერსიტეტსა და Georgian Medical Journal-ს შორის გრძელვადიანი სტრატეგიული თანამშრომლობის ჩამოყალიბება, რომელიც ეფუძნება იმ პარტნიორობის მოდელს, რომელიც უკვე ვითარდება დავით ტვილდიანის სამედიცინო უნივერსიტეტთან და აკაკი წერეთლის სახელმწიფო უნივერსიტეტთან.
მხარეებმა განიხილეს თანამშრომლობის რამდენიმე მნიშვნელოვანი მიმართულება.
ერთ-ერთ მნიშვნელოვან შეთანხმებად გამოიკვეთა, რომ უნივერსიტეტი განიხილავს Georgian Medical Journal-ის აღიარებასა და რეკომენდაციას, როგორც აკადემიური და სამეცნიერო საქმიანობისათვის მნიშვნელოვან საერთაშორისო რეცენზირებად ჟურნალს. ასევე დაიგეგმა, რომ GMJ განთავსდება უნივერსიტეტის ბიბლიოთეკის სამეცნიერო რესურსებს შორის და რეკომენდებული იქნება აკადემიური პერსონალის, მკვლევრების, დოქტორანტების, რეზიდენტებისა და სტუდენტებისათვის სამეცნიერო საქმიანობასა და კვლევებში გამოყენების მიზნით, უნივერსიტეტის შესაბამისი პროცედურების დაცვით.
თანამშრომლობის ფარგლებში უნივერსიტეტის მკვლევრებსა და აკადემიურ პერსონალს ექნებათ შესაძლებლობა, Georgian Medical Journal-ში სამეცნიერო ნაშრომები გამოქვეყნების საფასურის გარეშე წარადგინონ. ამასთან, ყველა ხელნაწერი შეფასდება ჟურნალის დამოუკიდებელი საერთაშორისო რეცენზირების, სამეცნიერო და სარედაქციო სტანდარტების სრული დაცვით.
შეთანხმების კიდევ ერთი მნიშვნელოვანი მიმართულებაა GMJ News-თან თანამშრომლობა, რომლის მეშვეობითაც სისტემატურად გაშუქდება უნივერსიტეტის სამეცნიერო, საგანმანათლებლო და ინსტიტუციური საქმიანობა, კვლევითი პროექტები, კონფერენციები, მიღწევები და სხვა მნიშვნელოვანი სიახლეები როგორც საქართველოს, ისე საერთაშორისო აკადემიური საზოგადოებისათვის.
მხარეებმა ასევე განიხილეს GMJ Academy-ის ფარგლებში ერთობლივი ელექტრონული სასწავლო პროგრამებისა და უწყვეტი პროფესიული განვითარების (CPD) კურსების შექმნის შესაძლებლობა, რაც ხელს შეუწყობს თანამედროვე, საერთაშორისო სტანდარტებზე დაფუძნებული საგანმანათლებლო რესურსების განვითარებას.
შეხვედრაზე განსაკუთრებული ყურადღება დაეთმო სამეცნიერო ღონისძიებების ერთობლივ ორგანიზებას. მხარეებმა გამოთქვეს მზადყოფნა, ითანამშრომლონ სამედიცინო და სამეცნიერო კონფერენციების, სემინარების, ვორქშოფებისა და სხვა აკადემიური ღონისძიებების დაგეგმვასა და განხორციელებაში. ამასთან, Georgian Medical Journal მზად არის უზრუნველყოს ასეთი ღონისძიებების სამეცნიერო-ტექნიკური მხარდაჭერა, მათ შორის კონფერენციის მასალების, თეზისების, შერჩეული სამეცნიერო ნაშრომებისა და კონფერენციის კრებულების საერთაშორისო სტანდარტების შესაბამისად რედაქტირება და გამოქვეყნება.
შეხვედრის მონაწილეებმა განსაკუთრებულად აღნიშნეს, რომ აღნიშნული თანამშრომლობა მიზნად ისახავს საქართველოში სამეცნიერო კვლევების ხარისხის ამაღლებას, ახალგაზრდა მკვლევართა მხარდაჭერას, საერთაშორისო სამეცნიერო სივრცეში ქართული მეცნიერების ხილვადობის გაზრდას, მტკიცებულებებზე დაფუძნებული მედიცინის განვითარებასა და უმაღლეს საგანმანათლებლო დაწესებულებებსა და დამოუკიდებელ სამეცნიერო პლატფორმებს შორის მდგრადი თანამშრომლობის გაძლიერებას.
შეხვედრის დასასრულს პროფესორმა გიორგი ფხაკაძემ მადლობა გადაუხადა ბათუმის შოთა რუსთაველის სახელმწიფო უნივერსიტეტის რექტორს, პროფესორ ტიტე აროშიძეს, საბუნებისმეტყველო მეცნიერებათა და ჯანდაცვის ფაკულტეტის დეკანს, პროფესორ რუსუდან ხუხუნაიშვილს, და პროფესორ სალომე ღლონტს გულთბილი მასპინძლობის, ნაყოფიერი დიალოგისა და თანამშრომლობის მზადყოფნისათვის. მხარეებმა გამოხატეს სურვილი, რომ უახლოეს პერიოდში თანამშრომლობა ოფიციალურად გაფორმდეს და საფუძველი ჩაეყაროს მრავალმხრივ პარტნიორობას მეცნიერების, განათლებისა და საზოგადოებრივი ჯანმრთელობის განვითარების ინტერესებიდან გამომდინარე.
ფოტო: (მარჯვნიდან მარცხნივ: პროფესორი რუსუდან ხუხუნაიშვილი — საბუნებისმეტყველო მეცნიერებათა და ჯანდაცვის ფაკულტეტის დეკანი, პროფესორი გიორგი ფხაკაძე, პროფესორი ტიტე აროშიძე — ბათუმის შოთა რუსთაველის სახელმწიფო უნივერსიტეტის რექტორი, პროფესორი სალომე ღლონტი. ფოტო გადაღებულია ბათუმის შოთა რუსთაველის სახელმწიფო უნივერსიტეტში.
