კემბრიჯის უნივერსიტეტის მკვლევრებმა ხელოვნური ინტელექტის გამოყენებით შექმნეს ახალი ტიპის ვაქცინა, რომლის მთავარი კომპონენტი მთლიანად AI-მ შეიმუშავა.
ინოვაციური პრეპარატი უკვე ადამიანებზე იტესტება და მეცნიერები იმედოვნებენ, რომ მომავალში ის შეძლებს დაცვას არა მხოლოდ COVID-19-ის ყველა ცნობილი შტამისგან, არამედ კორონავირუსების იმ სახეობებისგანაც, რომლებიც ჯერ ადამიანებში არ გავრცელებულა, თუმცა პოტენციურად პანდემიის გამოწვევა შეუძლიათ. კვლევა სამეცნიერო ჟურნალ Journal of Infection-ში გამოქვეყნდა.
ტრადიციული ვაქცინები, როგორც წესი, კონკრეტული ვირუსის ამოცნობას ასწავლის იმუნურ სისტემას, თუმცა ვირუსების მუდმივი მუტაციის გამო მათი ეფექტიანობა დროთა განმავლობაში მცირდება. ხელოვნურმა ინტელექტმა ათასობით მონათესავე კორონავირუსის გენეტიკური მონაცემი გააანალიზა და გამოავლინა ის მახასიათებლები, რომლებიც სხვადასხვა შტამში თითქმის უცვლელად არის შენარჩუნებული. სწორედ ამ საერთო ელემენტებზე დაფუძნდა ახალი ვაქცინა.
განსხვავებით COVID-19-ის დროს ფართოდ გამოყენებული mRNA ვაქცინებისგან, ახალი პრეპარატი დნმ-ის ტექნოლოგიას იყენებს. მეცნიერების თქმით, ასეთი ვაქცინები უფრო სტაბილურია, მათი შენახვა და ტრანსპორტირება შედარებით მარტივია, რაც განსაკუთრებით მნიშვნელოვანია იმ ქვეყნებისთვის, სადაც სპეციალური სამაცივრო ინფრასტრუქტურა შეზღუდულია.
პირველმა კლინიკურმა ცდებმა აჩვენა, რომ ვაქცინა უსაფრთხოა და ორგანიზმში ისეთი ანტისხეულების წარმოქმნას იწვევს, რომლებიც კორონავირუსების სხვადასხვა წარმომადგენელს ცნობენ. მიუხედავად ამისა, სპეციალისტები აღნიშნავენ, რომ საჭიროა უფრო მასშტაბური კვლევები, რათა დადგინდეს, რამდენად ეფექტიანად იცავს ის რეალურ პირობებში ინფექციისგან და რამდენ ხანს ნარჩუნდება მიღებული იმუნიტეტი.
მკვლევრები მიიჩნევენ, რომ მსგავსი უნივერსალური ვაქცინები მომავალში შეიძლება გადამწყვეტ იარაღად იქცეს არა მხოლოდ კორონავირუსების, არამედ გრიპისა და სხვა სწრაფად ცვალებადი ვირუსების წინააღმდეგ ბრძოლაში.
