პრემიერ-მინისტრთან დიუშენის კუნთოვანი დისტროფიით დაავადებული ბავშვის მშობლების შეხვედრა დასრულდა. გადაწყდა, რომ შეიქმნება სამუშაო ჯგუფი, რომელიც სავარაუდოდ 5 ივნისს კიდევ ერთხელ შეიკრიბება.
მთავრობის ადმინისტრაციაში მშობლებს პრემიერ-მინისტრი, ჯანდაცვის მინისტრი და მთავრობის ადმინისტრაციის უფროსი თითქმის 2 საათის განმავლობაში ხვდებოდა.
ჯანდაცვის მინისტრმა განაცხადა, რომ სასარგებლო შეხვედრა იყო.
მისივე თქმით, გადაწყვეტილებების მიღება არ არის მარტივი, ვინაიდან საუბარია 4 ტიპის მედიკამენტზე, რომელთა ირგვლივ სტატუსიც, მდგომარეობაც, განწყობაც, პოტენციალიც, გადაწყვეტილების მიღების მზადყოფნაც კი, თვისებრივად განსხვავებულ ეტაპზეა.
“ერთმნიშვნელოვნად სასარგებლო შეხვედრა იყო. ყოველთვის მნიშვნელოვანია იმ ხალხთან საუბარი, ვისაც უნდა ემსახურებოდეს საბოლოო ჯამში ნებისმიერი ახალი გადაწყვეტილება, რომელიც შეიძლება მზადდებოდეს. რაც შეეხება საკუთრივ გადაწყვეტილებას, ამ მიმართულებით, ბუნებრივია, რომ ამას მუშაობა დასჭირდება და ამ მუშაობას კი ბუნებრივია ალტერნატივა არ აქვს. სწორედ ამას ვსაუბრობ პირველივე დღიდან და ესეც კრიტიკულად მნიშვნელოვანია. საკითხები, რომელთან დაკავშირებული ხედვაც ჩვენ მშობლებისგან მოვისმინეთ, ესეც განსაკუთრებული ინტერესის საგანია და ჩვენთვის ეს არის გარემოება, რომელსაც აუცილებლად ყურადღება უნდა მიექცეს. ამ საკითხებზე გადაწყვეტილებების მიღება არ არის მარტივი, ვინაიდან საუბარია 4 ტიპის მედიკამენტზე, რომელთა ირგვლივ სტატუსიც, მდგომარეობაც, განწყობაც, პოტენციალიც, გადაწყვეტილების მიღების მზადყოფნაც კი, აბსოლუტურად, თვისობრივად განსხვავებულ ეტაპზეა. დასახელებული მედიკამენტებიდან ორთან დაკავშირებით, ნაკლები კითხვები არსებობს, სხვასთან მიმართებაში კი მეტია ეს კითხვები. რა თქმა უნდა, ყველაფერი ეს აუცილებლად საჭიროებს ძალიან დეტალურ ანალიზს და ამის მიხედვით გადაწყვეტილებების მიღებას. ამ თვალსაზრისით იყო საკმაოდ ნაყოფიერი, დატვირთული და მნიშვნელოვანი ეს შეხვედრა,”- განაცხადა სარჯველაძემ.
ასევე, ჯანდაცვის მინისტრის განცხადებით, სავარაუდოდ, უახლოეს მომავალში კიდევ იქნება მსგავსი შეხვედრა. სარჯველაძის თქმით, ყველა გადაწყვეტილება მიღებული იქნება იმის მიხედვით, თუ რა არის ყველაზე მეტად სასარგებლო იმ პაციენტებისთვის, ვისაც ეს რეალურად უნდა ემსახურებოდეს:
“იყო საუბარი ისეთ საკითხებზეც, რომლებიც ეხებოდა მაგალითად პოლიტიკოსების მხრიდან ამის არასწორად გამოყენებას და ა.შ. ბუნებრივია ხაზი გაესვა იმ გარემოებას, რომ უპირველესად ჩვენ ერთმნიშვნელოვნად ვართ განწყობილი საიმისოდ, რომ რაც შეიძლება სწრაფად და ეფექტიანად მოინახოს გადაწყვეტილებები, რომელიც იქნება რეალურად სასარგებლო. სავარაუდოდ, უახლოეს მომავალში კიდევ გვექნება ასეთი შეხვედრა, ამ საკითხებზე მსჯელობა კიდევ გაგრძელდება და როგორც ეს დასაწყისშიც აღინიშნა, რა წამს იქნება მზად გადაწყვეტილება მისაღებად, რა თქმა უნდა, ყოველგვარი დაყოვნების გარეშე იქნება ასეთი გადაწყვეტილებები მიღებული. ოღონდ, ამისთვის აუცილებელია, რომ გადაწყვეტილება იყოს მზად მიღებისთვის. ჩვენი მომდევნო შეხვედრების დროს, მათ შორის იმ თემაზეც იქნება საუბარი, თუ როგორ უნდა განვაგრძოთ მუშაობა, როგორ იქნება საჭიროებები, სად რა ეტაპზე ვართ, როგორ უნდა გავაგრძელოთ იგივე ერთმანეთთან კომუნიკაციაც და სხვადასხვა ფორმატები. ყველაფერი, ყველა გადაწყვეტილება მიღებული იქნება იმის მიხედვით, თუ რა არის ყველაზე მეტად სასარგებლო იმ პაციენტებისთვის, ვისაც ეს რეალურად უნდა ემსახურებოდეს,” – აცხადებს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი მიხეილ სარჯველაძე.
