საქართველოს საზოგადოებრივი ჯანდაცვის ინსტიტუტის ხელმძღვანელი, პროფესორი გიორგი ფხაკაძე ჯანდაცვის სამინისტროს გავრცელებულ ინფორმაციას ეხმიანება, სადაც ნათქვამია, რომ მედიაში გავრცელებული ინფორმაცია, თითქოს საქართველოს ფარგლებს გარეთ 6 თვეზე მეტი ვადით მყოფი მოქალაქეები ვერ ისარგებლებენ საყოველთაო ჯანდაცვის პროგრამის სერვისებით, არ შეესაბამება სიმართლეს და მიზანმიმართულად, საზოგადოების შეცდომაში შეყვანის მცდელობას წარმოადგენს.
„სრულად ვეთანხმები. „მკვდარი სულებით“ ვაჭრობა უნდა დასრულდეს ერთხელ და სამუდამოდ.
როცა პოლიკლინიკები იყენებენ ან „ყიდულობენ“ პირადობებს, მათ შორის, გარდაცვლილთა მონაცემებს, რათა ბიუჯეტიდან მიიღონ თანხები, ეს აღარ არის ხარვეზი — ეს არის წინასწარ დაგეგმილი თაღლითობა და საჯარო ფულის სისტემური ძარცვა.
ამ პრაქტიკით ზარალდება რეალური პაციენტი, იკარგება რესურსი და ინგრევა ჯანდაცვის სისტემის ნდობა.
მკაცრი კონტროლი, რეალური იდენტიფიკაცია და პასუხისმგებლობა ერთადერთი გზაა სისტემის გაწმენდისთვის.
ეს გადაწყვეტილება არა მხოლოდ მისასალმებელია — ის აუცილებელია სამართლიანი და სუფთა ჯანდაცვისთვის“, – წერს გიორგი ფხაკაძე.
