საქართველოში ვირუსული ინფექციების გავრცელება მკვეთრად გაიზარდა – “ღორის გრიპის“ პარალელურად ქვეყანაში A ტიპის ე.წ. ჰონკონგის შტამიც გააქტიურდა. სპეციალისტების ინფორმაციით, აღნიშნული ვირუსი უფრო სწრაფად ვრცელდება და ხშირად მძიმე მიმდინარეობით ხასიათდება
საქართველოში ამ დროისთვის გრიპის ვირუსის სამი განსხვავებული ტიპი ვრცელდება, რომელთაგან ყველაზე ფართოდ გავრცელებული ე.წ. ჰონგ-კონგის გრიპია — მისი წილი შემთხვევების დაახლოებით 65%-ს შეადგენს. იაშვილის სახელობის ბავშვთა ცენტრალური საავადმყოფოს სამედიცინო დირექტორისა და თსსუ-ის პროფესორის, ივანე ჩხაიძის ინფორმაციით, ბოლო ერთ თვეში მნიშვნელოვნად გაიზარდა იმ ბავშვების რაოდენობა, რომლებიც რესპირაციული მედიცინის დეპარტამენტს მიმართავენ. ხშირ შემთხვევაში ჰოსპიტალიზაციის მიზეზი ფილტვების ანთებაა, რომელიც გრიპის გართულების შედეგად ვითარდება.
ჩხაიძის განმარტებით, გრიპმა ქვეყანაში უჩვეულოდ ადრე მოიპოვა დომინანტური პოზიცია. დაავადებათა კონტროლის ეროვნული ცენტრის მონაცემები აჩვენებს, რომ ბოლო კვირებში ლაბორატორიულად დადასტურებულ შემთხვევათა უმრავლესობა სწორედ გრიპზე მოდის. მათ შორის ჭარბობს A ტიპის გრიპი, კერძოდ H3N2 შტამი, რომელიც ჰონგ-კონგის გრიპის სახელითაა ცნობილი. შედარებით ნაკლებია H1N1-ის, ე.წ. ღორის გრიპის შემთხვევები, ხოლო B ტიპის გრიპი მინიმალურ პროცენტს შეადგენს. სპეციალისტის თქმით, ყველა ეს შტამი იმ ვაქცინის შემადგენლობაში იყო, რომელიც ქვეყანაში გამოიყენებოდა, რაც იმას ნიშნავს, რომ ვაქცინა ვირუსებს შეესაბამება.
თუ შარშან გრიპის შემთხვევების პიკი თებერვალში დაფიქსირდა, წელს ვირუსის აქტიური გავრცელება გაცილებით ადრე დაიწყო. მსგავსი ტენდენცია არაერთ ქვეყანაში აღინიშნება. ექიმის შეფასებით, ამის ერთ-ერთი მთავარი მიზეზი ჰონგ-კონგის გრიპის შტამია, რომელმაც ზაფხულში მუტაციები განიცადა და უფრო ადვილად გადამდები გახდა.
გრიპი იმ ვირუსებს მიეკუთვნება, რომელთა წინააღმდეგაც არსებობს ეფექტური ანტივირუსული პრეპარატები, განსაკუთრებით რისკის ჯგუფებისთვის. მკურნალობის დაწყება მაქსიმალურად სწრაფად არის რეკომენდებული, რადგან დაავადების პირველი 48 საათის განმავლობაში მედიკამენტებს ყველაზე მაღალი ეფექტიანობა აქვთ.
რაც შეეხება კლინიკურ სურათს, რესპირაციული მედიცინის დეპარტამენტი ქვეყანაში ერთადერთია, რომელიც სასუნთქი გზების მწვავე დაავადებების მართვაზეა სპეციალიზებული. ბოლო პერიოდში ამ განყოფილებაში მიმართვიანობა მნიშვნელოვნად გაიზარდა, ხოლო ჰოსპიტალიზაციის ხშირი მიზეზი გრიპით გამოწვეული პნევმონიაა.
ივანე ჩხაიძე განსაკუთრებით მოუწოდებს 5 წლამდე ასაკის ბავშვების მშობლებს, ყურადღება არ მოადუნონ. მისი თქმით, მაღალი სიცხის რამდენიმე დღე ლოდინი არ არის მიზანშეწონილი. თუ ბავშვს მაღალი ტემპერატურა, ძლიერი თავისა და ყელის ტკივილი, სახსრების ტკივილი აქვს და საკვებზე უარს ამბობს, პირველივე დღიდან უნდა ჩაერთოს ოჯახის ექიმი, რომელიც გადაწყვეტს, საჭიროა თუ არა ჰოსპიტალიზაცია და ანტივირუსული მკურნალობის დაწყება.
iPhone: https://apps.apple.com/fr/app/sheni/id6746877342?l=en-GB
Telegram არხი: https://t.me/SheniEkimi
