ამაზონის ტროპიკული ტყეების მორიელის შხამი — ახალი იმედი ძუძუს კიბოს წინააღმდეგ
ბოლო კვლევებმა, რომლებიც საფრანგეთში გამართულ სამეცნიერო კონფერენციაზე FAPESP Week France–ზე წარადგინეს, შეიძლება სამომავლოდ რევოლუციური აღმოჩნდეს ძუძუს კიბოს მკურნალობაში. კერძოდ, ბიოაქტიური ნივთიერება, რომელიც იზოლირებულია ამაზონის ტროპიკულ ტყეებში ბინადარი მორიელის (Brotheas amazonicus) შხამიდან, პერსპექტიულად მიიჩნევა ონკოლოგიური თერაპიებისთვის.
მსოფლიო მოსახლეობის დაბერება, დამაბინძურებლების ზემოქმედების ზრდა და სტრესის ქვეშ მყოფი ეკოსისტემები განაპირობებს კიბოს, დემენციისა და სხვა დაავადებების მაჩვენებელთა ზრდას. ამიტომ, სამკურნალო საშუალებათა მეტი არჩევანის ძებნაში, ზოგიერთი მკვლევარი ყველაზე ნაკლებად სავარაუდო ადგილებშიც ეძებს — მაგალითად, მორიელის კუდში
კვლევის ავტორები — ბრაზილიელი მეცნიერები — იყენებენ ჰეტეროლოგიური ექსპრესიის თანამედროვე მეთოდს, რაც საშუალებას აძლევთ მათ, სხვადასხვა ორგანიზმში მაღალი სიზუსტით და დიდი რაოდენობით მიიღონ სასურველი ცილები. ამ შემთხვევაში გამოყენებულ იქნა საფუარის სახეობა Komagataella pastoris, რომელიც ეფექტურად მუშაობს „ცილოვანი ქარხნის“ როლში.
BamazScplp1 – შხამის ცილა, რომელიც ნგრევს კიბოს უჯრედებს
აღმოჩენილი ცილა, სახელწოდებით BamazScplp1, თავის მოქმედებით ჰგავს ქიმიოთერაპიულ პრეპარატებს და იწვევს ძუძუს კიბოს უჯრედების ნეკროზს — პროცესს, რომელიც უჯრედების განადგურებას და დაშლას იწვევს. კვლევის ხელმძღვანელი, სან-პაულუს უნივერსიტეტის პროფესორი ელიან კანდიანი არანტისი, აღნიშნავს, რომ ეს მოლეკულა სხვა მორიელების შხამში არსებულ ანალოგებს წააგავს, თუმცა განსაკუთრებული მოქმედებით გამოირჩევა.
ბიოტექნოლოგია, რომელიც მომავალ მედიცინას ცვლის
ამავე ტექნოლოგიის გამოყენებით, მეცნიერებმა სხვა მოლეკულაც შექმნეს, რომელიც სისხლძარღვების ზრდას აძლიერებს. იგი მიღებულია გველის შხამისა და პირუტყვის სისხლის კომპონენტების საფუძველზე და პოტენციურად გამოსადეგია ქსოვილების რეგენერაციასა და სამედიცინო ინჟინერიაში.
ჰეტეროლოგიური ექსპრესიის მეთოდით შესაძლებელია არამარტო მოლეკულების სწრაფი მიღება, არამედ მათი ფუნქციების ღრმა შესწავლაც — რაც განსაკუთრებით მნიშვნელოვანია მედიცინაში ბუნებრივი, ბიოაქტიური ნივთიერებების დანერგვისთვის.
ბუნებრივი სამკურნალო ნივთიერებები — დროა ვიფიქროთ შენარჩუნებაზეც
გლობალურად მზარდი კიბოს, დემენციისა და სხვა დაავადებების გავრცელება, დაბერებული მოსახლეობა და დაბინძურებული გარემო მეცნიერებს აიძულებს, სამკურნალო რესურსები ბუნების ყველაზე უცნობ ადგილებში ეძებონ. თუმცა, ამავე დროს აუცილებელია ეკოსისტემების დაცვა, რათა მომავლის მედიცინას არ დავუკარგოთ მნიშვნელოვანი შესაძლებლობები.
