ბათუმში, დასაქმების მასშტაბური ფორუმი გაიმართა. ღონისძიების ფარგლებში, სამუშაოს მაძიებლებს, შესაძლებლობა ჰქონდათ, 70-ზე მეტი კომპანიის 2000-ზე მეტ ვაკანსიას გასცნობოდნენ.
ფორუმზე, წარმოდგენილი იყო ვაკანსიები მომსახურების, სავაჭრო, სარესტორნო, სასტუმრო, დისტრიბუციის, სამრეწველო, სატრანსპორტო, საზღვაო, ლოჯისტიკური, სამშენებლო, საფინანსო, ფარმაციისა და განათლების სფეროებიდან. საუბარია როგორც სეზონური, ისე – გრძელვადიანი დასაქმების მიმართულებებზე.
ღონისძიება ჯანდაცვის მინისტრის მოადგილე გიორგი ცაგარეიშვილმა გახსნა და იმ შესაძლებლობებზე ისაუბრა, რომელსაც ფორუმი სამუშაოს მაძიებლებისა და დამსაქმებლებისთვის იძლევა. სიტყვით გამოსვლისას, ღონისძიების მნიშვნელობაზე გააკეთეს აქცენტი ადგილობრივი ხელისუფლების წარმომადგენლებმაც.
ფორუმის ფარგლებში, სტუდენტებისთვის საჯარო ლექცია წაიკითხა ადამიანური რესურსების მართვის ექსპერტმა ზაზა ქოიავამ და ახალგაზრდებს გასაუბრებისა და საკუთარი თავის წარმოჩენის შესახებ პრაქტიკული რჩევები გაუზიარა.
აჭარის დასაქმების ფორუმი უკვე მეექვსედ გაიმართა და ტრადიციულად, საზღვაო სეზონის გახსნას დაემთხვა. მისი მიზანი მოქალაქეთა დასაქმების ხელშეწყობა, ხოლო დამსაქმებლებისთვის — კადრების შერჩევის პროცესის გამარტივებაა. ღონისძიება დასაქმების ხელშეწყობის სახელმწიფო სააგენტოს, აჭარის დასაქმების სააგენტოს, ბათუმის სახელმწიფო უნივერსიტეტისა და ბათუმის სახელმწიფო საზღვაო აკადემიის თანამშრომლობით ჩატარდა.
