„ერთ-ერთი ყველაზე დიდი გამოწვევა, რომელიც რეგიონის ქვეყნების დამახასიათებელი იყო და ჩვენ, პრაქტიკულად, ლიდერები ვართ ამ პრობლემის გადაჭრის თვალსაზრისით, ეს გახლავთ C ჰეპატიტი“, – განაცხადა ჯანდაცვის მინისტრმა, მიხეილ სარჯველაძემ.
მინისტრმა ქვეყანაში მიმდინარე C და B ჰეპატიტის პროგრამებზე ისაუბრა და ამ მიმართულებით მიღწეულ შედეგებს გაუსვა ხაზი.
„დიდი შედეგებია, რეალურად საქართველო აღიარებულია საერთაშორისო მასშტაბით, როგორც სამაგალითო ქვეყანა. თუკი ვინმეს მსგავსი პროექტის დაგეგმვის სურვილი აქვს მთელს მსოფლიოში, ალბათ ნებისმიერი ავტორიტეტული დაწესებულებიდან მიიღებს რეკომენდაციას, რომ ჩამოვიდეს და გაეცნოს შედეგებს, რომელიც აქვს საქართველოს.
ამ იდეის ავტორი და მთავარი სულის ჩამდგმელი არის ბატონი თენგიზ ცერცვაძე. პრაქტიკულად მისი გეგმის მიხევდით მიაღწია ქვეყანამ დიდ წარმატებას. სხვადასხვა დროს ბევრმა ადამიანმა მიიღო ამაში მონაწილეობა, მაგრამ ალბათ უპირველესი, ვინც შეუპოვრად იბრძოლა, რომ რეალურად ეს განხორციელებულიყო იყო ბატონი თენგიზ ცერცვაძე. თუმცა, ამას რა თქმა უნდა, რომ არ ჰქონოდა მთავრობისგან და იმხანად პრემიერ-მინისტრისგან ხელშეწყობა, რასაკვირველია, ამ თემის დაძვრა არ იქნებოდა ასე მარტივი.
წარმოუდგენელი რამ იყო დაახლოებით 15 წლის წინ, C ჰეპატიტის მქონე პაციენტისთვის, ისეთი რამ რაც დღეს ხელმისაწვდომია და ხელმისაწვდომია 2012 წლის ოქტომბრის შემდეგ წარმართული პროცესების შედეგად.
ვისარგებლებ ამ შესაძლებლობით, მოვუწოდებ ყველას, ვისაც შესაძლოა ჰქონდეს დადგენილი ეს დიაგნოზი – მათ აქვთ შესაძლებლობა, რომ ჩაერთონ ამ პროგრამაში, სრულად უფასოდ იმკურნალონ და განიკურნონ.
ძალიან მაღალია განკურნების მაჩვენებელი, ესეც ჩვენი ექიმების დამსახურებით – პრაქტიკულად, 100%-თან გვაქვს გამოჯანმრთელების მაჩვენებელი. ეს უზარმაზარი შედეგია“, – განაცხადა მიხეილ სარჯველაძემ.
მინისტრმა აღნიშნა, რომ C ჰეპატიტის ელიმინაციის პროგრამის მსგავსად, უკვე დიდი წარმატებით მიმდინარეობს B ჰეპატიტის პროგრამაც.
„ახალი დაწყებულია B ჰეპატიტის პროგრამა, რომელიც ანალოგიურად, განსაკუთრებულ დიდ ყურადღებას მოითხოვს, იმიტომ რომ დიდი ზიანის მომტანია მთლიანად საზოგადოებისთვის, ეს საკმაოდ მასიურად გავრცელებული დაავადება. მასთან ბრძოლა აუცილებელია მათ შორის ვაქცინაციით და ბუნებრივია მკურნალობით, რომელსაც სახელმწიფო სთავაზობს მოსახლეობას და უპრეცედენტოდ მაღალია ხელმისაწვდომობის ხარისხი, ყველა სერვისი ხელმისაწვდომია აბსოლუტურად უფასოდ“, – განაცხადა ჯანდაცვის მინისტრმა.
მიხეილ სარჯველაძე C ჰეპატიტის ელიმინაციის პროგრამის შეწყვეტასთან დაკავშირებით, გავრცელებულ ცრუ ინფორმაციასაც გამოეხმაურა, აღნიშნა, რომ მსგავსი დეზინფორმაციის გავრცელების არავითარი მიზეზი არ არსებობდა. ხაზი გაუსვა, რომ პროგრამის შეწყვეტას საფრთხე არ დამუქრებია და არც მომავალში დაემუქრება.
„ნიშანწყალიც არ არსებობს იმისა, რომ ეს პროგრამა შეწყდეს, სახელმწიფოა გარანტი იმისა რომ ეს პროგრამა მივა ბოლომდე და საქართველოში მოხდება C ჰეპატიტის ელიმინაცია. უკადრისი ქმედების თვალსაჩინო მაგალითი იყო ის განცხადებები, რომელსაც ვისმენდით C ჰეპატიტის პროგრამის თითქოსდა მოსალოდნელი შეწყვეტის თაობაზე, საბედნიეროდ ეს არც ამ დრომდე ახდა და არც მომავალში ახდება“, – აღნიშნა მიხეილ სარჯველაძემ.
