როგორ უნდა შევანელოთ დაბერების პროცესი?
ასაკთან ერთად დაბერების პროცესი ბუნებრივია, თუმცა არსებობს რამდენიმე გზa, რომელიც ამ პროცესს შეანელებს. იტალიელმა მეცნიერებმა ახალი კვლევა გამოაქვეყნეს, სადაც აღნიშნულია, თუ როგორ მოქმედებს D ვიტამინის დანამატები დაბერების პროცესზე. ახალი კვლევა Nutrients-ში გამოქვეყნდა.
პერუჯას უნივერსიტეტის გერიატრიის სპეციალისტმა, კარმელინდა რუჯიერომ და მისმა კოლეგებმა მიმოიხილეს დაკვირვებითი კვლევები და კლინიკური ცდები, რომლებშიც ეძებდნენ D ვიტამინის შესაძლო ეფექტებს დაბერების ბიოლოგიურ ნიშნებზე.
„ამ დრომდე, მტკიცებულებები მწირია და ძირითადად ეფუძნება პრეკლინიკურ მოდელებს“ – ამბობენ მკვლევრები.
მეცნიერების თქმით, ზოგიერთი კვლევის მიხედვით, D ვიტამინი ეპიგენეტიკურ დაბერებას ანელებს, რადგან D ვიტამინის დაბალი დონის მქონე ადამიანები ბიოლოგიურად უფრო ხანდაზმულები არიან, ვიდრე ისინი, ვისაც D ვიტამინი ნორმაში აქვს. თუმცა მათივე თქმით, ძალიან ცოტაა მტკიცებულება, თუ რა დოზით ან რა ასაკში შეიძლება ჰქონდეს D ვიტამინის დანამატებს ეფექტი, რადგან ამ მიმართულებით ძალიან ცოტა კვლევაა ჩატარებული და შედეგებიც არასრულია.
„მიუხედავად იმისა, რომ D ვიტამინის დანამატების, როგორც ადამიანის დღეგრძელობის მხარდამჭერი სტრატეგიისადმი ინტერესი დიდია და ამას ზოგიერთი მტკიცებულებაც უჭერს მხარს, ზუსტი პასუხის დადგენისგან ჯერ შორს ვართ“, – წერენ მკვლევრები.
შეგახსენებთ, დღეს ყველასთვის ცნობილია, რომ D ვიტამინი უმნიშვნელოვანესია კუნთებისა და ძვლებისთვის, რომლებიც ასაკის მატებასთან ერთად სუსტდება. თუმცა, მიუხედავად იმისა, რომ D ვიტამინის ნაკლებობისას მისი დონის მომატება ლოგიკური ჩანს, ექსპერტები ამბობენ, რომ დანამატების სახით ბევრი ვიტამინის მოხმარება აუცილებლად არ ნიშნავს, რომ ისინი ჯანმრთელობისთვის უკეთესია. მეცნიერები გვირჩევენ, ნებისმიერი ვიტამინის ექიმთან რეკომენდაციის შედეგად მიღებას.
