საკმაოდ დიდი სიმრავლეა ნაბიჯებისა, რომელთან დაკავშირებითაც მუშაობამ შესაძლოა კონკრეტული შედეგები მოიტანოს პაციენტის უსაფრთხოების უზრუნველსაყოფად, – განაცხადა ჯანდაცვის მინისტრმა მიხეილ სარჯველაძემ გადაცემა „დღის ქრონიკაში“ პაციენტთა უსაფრთხოების მსოფლიო დღის აღნიშვნასთან დაკავშირებით.
მინისტრის თქმით, საქართველოს ვალდებულებაა გამოეხმაუროს ამ დღეს. „საკმაოდ დიდი სიმრავლეა ნაბიჯებისა, რომელთან დაკავშირებითაც მუშაობამ შესაძლოა კონკრეტული შედეგები მოიტანოს პაციენტის უსაფრთხოების უზრუნველსაყოფად“
„ჩვენ ვივალდებულეთ, მათ შორის ჩვენც, როგორც ერთ-ერთმა მონაწილე სახელმწიფომ იმ საერთაშორისო თანამშრომლობის, რომელიც ჯანმრთელობის მსოფლიო ორგანიზაციის ფარგლებში ხორციელდება და რომლის მიზანიც, ერთ-ერთ მთავარ პრიორიტეტად არის გამოცხადებული, რომ რაც შეიძლება მეტი ყურადღება მიექცეს ამ თემას. ამიტომ დაწესდა 17 სექტემბერი, როგორც დღე, როდესაც აღინიშნება მიღწევები, რომლებიც გვაქვს წლიდან წლამდე ნებისმიერ ქვეყანას ამ მიმართულებით და როგორია სამომავლო ხედვები და გეგმები ამის გაანალიზება რომ მოხდეს.
ჩვენც გამოვეხმაურეთ, რა თქმა უნდა, ჩვენი ვალდებულებაა, გამოვეხმაურეთ და აღვნიშნეთ ეს დღე. აღვნიშნეთ, პრაქტიკულად ყველა მნიშვნელოვან ასოციაციასთან შეხვედრით და საჯარო დისკუსიით იმასთან დაკავშირებით, თუ რა შეიძლება მოვიფიქროთ ისეთი, რითაც შესაძლოა პაციენტის უსაფრთხოების დაცვა უფრო მაღალი სტანდარტით ხორციელდებოდეს და ძალიან დიდი სიმრავლე იყო მოსაზრებების. ჩვენ ამისთვის მოვემზადეთ საგანგებოდ, გვქონდა კონკრეტული შეთავაზება, რომ საკუთარი მოსაზრებები წარმოედგინა ყველა ასოციაციას. ყველამ თავ-თავისი პერსპექტივიდან ასეთი მოსაზრებები გაგვიზიარა და საკმაოდ დიდი სიმრავლეა კონკრეტული ნაბიჯებისა, რომელთან დაკავშირებითაც შესაძლოა მუშაობამ კონკრეტული შედეგები მოიტანოს პაციენტის უსაფრთხოების უზრუნველსაყოფად.
აქვე მინდა აღვნიშნო, რომ ეს არის, ზოგადად, გლობალური პრობლემა. აქედან გამომდინარე, ბუნებრივია, საქართველოც აცნობიერებს, რომ ეს პრობლემა შესაძლოა არსებობდეს და ამ გამოწვევის დასაძლევად, რეალურად, კონკრეტული ნაბიჯები ამ დრომდეც იგეგმებოდა. ძალიან სერიოზული ნაბიჯებია უკანასკნელ პერიოდში ამ მიმართულებით გადადგმული და რეალურად, ეს განხორციელდება.
დიაპაზონი ასეთი საკითხებისა და სპექტრი, ძალიან დიდია. მოიცავს, მაგალითად, დაწყებული იმით, რომ სამაჯურები უკეთდებოდეს კონკრეტულ პაციენტებს იმისთვის, რომ არ მოხდეს მათი შეცდომით არევა, პერსონალს ჰქონდეს ზუსტი ინფორმაცია, რომელ პაციენტთან აქვთ ურთიერთობა. აქედან დაწყებული, დამთავრებული, მაგალითად საგანმანათლებლო სისტემებში ინკორპორირება ისეთი კურიკულუმების, რომელიც რეალურად გააუმჯობესებს მომავალი ექიმების მზადყოფნას“, – აღნიშნა მიხეილ სარჯველაძემ.
