იმუნიზაციის კვირეულის ფარგლებში, დღეს გაგიზიარებთ სასარგებლო ინფორმაციას პაპილომავირუსის საწინააღმდეგო ვაქცინაციის მნიშვნელობაზე.
ადამიანის პაპილომავირუსი სქესობრივი გზით გადამდები ყველაზე გავრცელებული ინფექციაა. ადამიანის პაპილომავირუსებს კიბოს გამოწვევა შეუძლიათ როგორც ქალებში, ისე კაცებში. მათ შორის, საშვილოსნოს ყელის კიბოს ძირითადი გამომწვევი სწორედ ადამიანის პაპილომავირუსია, რომელიც ქალებში კიბოსთან ასოცირებული სიკვდილობის მეორე მიზეზს წარმოადგენს ძუძუს კიბოს შემდეგ.
პაპილომავირუსული ინფექციის შემთხვევათა დიდი ნაწილი სრულიად უსიმპტომოდ მიმდინარეობს და ხშირად თვითგანკურნებით მთავრდება ისე, რომ პაციენტისთვის შეუმჩნეველი რჩება.
ადამიანის პაპილომავირუსისგან თავის დასაცავად ერთ-ერთი პროფილაქტიკური საშუალება პაპილომავირუსის საწინააღმდეგო ვაქცინაციაა, რომელიც ადამიანის ორგანიზმს პაპილომავირუსის რამდენიმე შტამისგან იცავს, მათ შორისაა მე-16 და მე-18 ტიპები, რომლებიც საშვილოსნოს ყელის კიბოს განვითარების ყველაზე ხშირ მიზეზს წარმოადგენს.
ჯანმრთელობის მსოფლიო ორგანიზაციის ვაქცინის უსაფრთხოების გლობალური საკონსულტაციო კომიტეტი (GACVS) რეგულარულად განიხილავს ფაქტობრივ მონაცემებს აპვ ვაქცინის უსაფრთხოების შესახებ. კომიტეტმა შეისწავლა ამერიკაში, ავსტრალიისა და იაპონიაში ჩატარებული ვაქცინაციის ეპიდზედამხედველობის მონაცემები. ზემოაღნიშნული ყველა წყარო ადასტურებს ვაქცინაციის დადებით შედეგს და უსაფრთხოებას. 2014 წლის მარტში GACVS-მა დაასკვნა, რომ აპვ ვაქცინა უსაფრთხოა.
საქართველოში, აცრების ეროვნული კალენდრის შესაბამისად, 10-11-12 წლის ბავშვები იცრებიან. დამატებითი სახელმწიფო პროგრამის ფარგლებში კი ვაქცინაცია დაფინანსებადია 13-26 წლის ვაჟებისთვის და 13-45 წლის გოგონებისთვის და ქალებისთვის.
