ვირუსმა, რომელიც შავთვალა ლობიოს აინფიცირებს, ფართო ეფექტიანობა აჩვენა თაგვებში მთელი რიგი მეტასტაზური სიმსივნეების აღკვეთაში, რაც აჩენს იმედს, რომ ამ ვირუსმა შეიძლება იგივე შედეგები ადამიანებშიც აჩვენოს. ამის შესახებ მეცნიერები ახალ კვლევაში იუწყებიან.
პარკოსანი მცენარის, სახელად ძაძის მოზაიკა ვირუსიდან აღებულმა ნანონაწილაკებმა სხვადასხვა ტიპის კიბოთი დაავადებული თაგვების გადარჩენის მაჩვენებელი გაზარდა და სისტემურად დათრგუნა სიმსივნის ზრდა. თაგვებს ჰქონდათ მკერდის, მსხვილი ნაწლავის (კოლონი) და საკვერცხის კიბო.
მკურნალობის შემდეგ მნიშვნელოვანი გაუმჯობესება აღენიშნათ იმ თაგვებსაც, რომლებსაც სიმსივნეები ქირურგიული ჩარევით ამოაჭრეს. კვლევა სან-დიეგოს კალიფორნიის უნივერსიტეტის ჯგუფმა ჩაატარა.
ძაძის მოზაიკური ვირუსი მცენარის პათოგენია, რომელიც ძაძაში (Vigna unguiculata) გვხვდება — პარკოსანთა სახეობაში, რომელშიც ასევე შედის ქვესახეობა, სახელად შავთვალა ლობიო.
ვირუსი თაგვებში პირდაპირ კიბოს უჯრედებს კი არ დაესხა თავს, არამედ იმუნოთერაპიის ფორმით იმოქმედა — ეს გახლავთ მკურნალობის მეთოდი, როცა კიბოს თავად სხეულის იმუნური სისტემა პოულობს და ანადგურებს.
ახალი კვლევა წარმოადგენს უფრო ფართო კვლევის ნაწილს, რომელსაც სან-დიეგოს კალიფორნიის უნივერსიტეტის ჯგუფი ნანოინჟინერ ნიკოლ შტაინმეცის ხელმძღვანელობით ატარებს.
შტაინმეცი და მისი კოლეგები წლების განმავლობაში ტესტავდნენ ძაძის მოზაიკა ვირუსის ნაწილაკებს, როგორც იმუნომოდულატორს — ნივთიერებას, რომელიც იმუნურ სისტემას ან თრგუნავს, ან როგორც ამ შემთხვევაში უნდოდათ, ასტიმულირებს.
ნანონაწილაკებმა წარსულში იმედისმომცემი შედეგები აჩვენა იმუნური პასუხის წახალისებაში, როდესაც ის პირდაპირ სიმსივნეში შეიყვანეს; შედეგები მიუთითებდა, რომ მკურნალობის ამ საშუალებამ შეიძლება აღკვეთოს კიბოს გავრცელება და ხელახლა დაბრუნება.
მკვლევართა განმარტებით, ვინაიდან ის მცენარის ვირუსია, ძუძუმწოვრების დაინფიცირება არ შეუძლია, მაგრამ თაგვის იმუნურმა სისტემამ ის მაინც უცხო სხეულად აღიქვა.
აღმოჩნდა, რომ ეს ყველაფერი იმუნური სისტემის მწვავე რეაქციას იწვევს, რაც ასევე აგულიანებს ახლომდებარე სიმსივნეზე თავდასხმას — ისევე როგორც ნებისმიერ მომავალ სიმსივნეზე, რომელიც იქ განვითარდება.
თუმცა, კვლევის თანახმად, ეს ყველაფერი არ არის. როგორ ირკვევა, წარმატებული შედეგისთვის სულაც არ არის აუცილებელი ნანონაწილაკების პირდაპირ სიმსივნეში შეყვანა. მისი მიწოდება შესაძლებელია სისტემატურად, რათა ხელი შეუშალოს მეტასტაზებს და გაზარდოს მრავალი სხვადასხვა კიბოსგან გადარჩენის მაჩვენებელი.
