2024 წლის 3 პრილს “აკრედიტაცია კანადას” ოფიციალური ვიზიტი გაიმართა კლინიკა ვივამედი • Vivamedi -ში.
შეხვედრას ესწრებოდნენ “აკრედიტაცია კანადას” აღმასრულებელი დირექტორი კატერინა ტარასოვა; პროფესორი გიორგი ფხაკაძე, “აკრედიტაცია კანადას” წარმომადგენელი საქართველოში და კლინიკა “ვივამედის” დირექტორი, ნინო ნადირაძე.
“აკრედიტაცია კანადა” საქართველოს 20-ზე მეტი კლინიკის აკრედიტაციის პროცესშია ჩართული.
ამჟამად “აკრედიტაცია კანადას” წარმომადგენლობა, გიორგი ფხაკაძის ხელმძღვანელობით, საქართველოშია და კლინიკებთან შეხვედრებს აქტიურ რეჟიმში მართავს.
შეხვედრის შემდეგ “შენი პულსი” “ვივამედის” დირექტორ ნინო ნადირაძეს ესაუბრა:
– ქალბატონო ნინო, თქვენი კლინიკა, საერთაშორისო აკრედიტაციის პროცესს გადის ,,აკრედიტაცია კანადას” ჩართულობით… რატომ გადაწყვიტეთ მათთან თანამშრომლობა და როგორ მიდის ეს პროცესი?
– რატომ გადავწყვიტეთ ,,აკრედიტაცია კანადა”? – იმიტომ, რომ არ მინდოდა ეს პროცესი ყოფილიყო პროცესისთვის. მინდოდა, ეს პროცესი ყოფილიყო შედეგზე ორიენტირებული.
არ შევმცდარვართ ნამდვილად, რადგან მაინტერესებს შენიშვნები, ყველა ჩვენი არასწორად წარმართული პროცესის გამოვლინება.
მომწონს, რომ ყველა შენიშვნას მათი მხრიდან ყოველთვის მოჰყვება გამოსწორების რეცეპტი და ეს მაინტერესებს. კი ბატონო, რაღაცას არასწორად ვაკეთებ, მაგრამ მითხარი – როგორ გამოვასწორო.
ყველა თემაზე, რაზეც მიიჩნევენ, რომ საერთაშორისო სტანდარტებს არ შეესაბამება, აუცილებლად იქვე გვთავაზობენ ამის გადაჭრის გზებს და ეს გზები არასოდეს არის გაუგონარი და არნახული. ყოველთვის არის ძალიან კონკრეტული, მორგებული, შესრულებადი და რეალისტური, მეტი რა შეიძლება მინდოდეს, ადამიანს, რომელსაც უყვარს თავისი კლინიკა, ის ადამიანები, ვინც იქ მუშაობენ და პრაქტიკულად, დღემდე ძალიან კმაყოფილი ვარ. პირველი 10 დღე ნამდვილად იყო სირთულეებით, რადგან ახლისა და შენიშვნის მიღება ჩვენს ხალხს ცოტა უჭირს… შემდეგ როდესაც ეს ადამიანები მიხვდნენ, რომ მათთვის და ჩვენთვის კეთდება ეს ყველაფერი და ესენი არ არიან ჩასაფრებული ადამიანები, რომელთაც უნდათ გამოგავლინონ, დაგსაჯონ და მერე კუთხეში დაგაყენონ, არამედ არიან იმისთვის, რომ შენ დაგეხმარონ ფეხზე წამოდგომაში, წელში გაიმართო და მთავარი ფუნქცია, რაც არის – პაციენტი მიიღო და გააცილო კმაყოფილი. მთელ ამ პროცესში, პაციენტი უნდა იყოს კმაყოფილი.
– რამდენად მნიშვნელოვანია, ზოგადად, აკრედიტაცის პროცესი, რომელიც დაიწყო საქართველოში? სავალდებულო აკრედიტაციას ვგულისხმობ…
– მნიშვნელოვანია! სასიცოცხლოდ აუცილებელია, ასე ვიტყოდი.
“შენი პულსი” გიორგი ფხაკაძესაც ესაუბრა:
“დღევანდელი შეხვედრა ძალიან მნიშვნელოვანია, რადგან ვესტუმრეთ ერთ-ერთ უმნიშვნელოვანეს საავადმყოფოს თავისი ისტორიით, გამოცდილებით და რაც მთავარია, ძალიან სპეციფიკური გამოცდილებიდან გამომდინარე, ალბათ იცით, რომ ეს არის პენიტენციურ სისტემაში ჩართული კლინიკა და ჩვენ უნდა გვახსოვდეს, რომ როცა ვლაპარაკობთ ჯანდაცვაზე, რაც არის ყველა მოქალაქისათვის.
ეს არიან ადამიანები, რომელთაც გარკვეული მიზეზების გამო არ აქვთ წვდომა ყოველდღიურ ცხოვრებაზე და არიან პენიტენციური სისტემის პაციენტები. მათთვის ხარისხიანი ჯანდაცვა ეს არის სახელმწიფოსა და საზოგადოების პასუხისმგებლობა და რა თქმა უნდა, ჩვენ, როგორც ,,აკრედიტაცია კანადის” და მისი გუნდისათვის, მნიშვნელოვანია, არამხოლოდ სტანდარტების დანერგვა, არამედ ამით ჩვენ ვეხმარებით ჯანდაცვის სისტემის გაუმჯობესებაში, რომ ჩვენი პენიტენციური სისტემის სტადარტებიც იყოს აწეული და პროცესში ზუსტად ამ კლინიკის ჩართულობა ჩვენთვის არის არამხოლოდ საინტერესო, არამედ ძალიან დიდი პასუხისგმებლობა, რადგან ამ კლინიკაში ჩვენი ჩართულობა ნიშნავს იმას, რომ ამით არამარტო საქართველოს ჯანდაცვის სისტემას ვეხმარებით, არამედ პენიტენციურ სისტემასაც ვეხმარებით, რაც ძალზე მნიშვნელოვანია.” – განაცხადა გიორგი ფხაკაძემ.
