2024 წლის 26 მარტს “აკრედიტაცია კანადას” წარმომადგენლობის ოფიციალური ვიზიტი გაიმართა კლინიკა “კონსილიუმ მედულაში”.
“აკრედიტაცია კანადა”, რომლის წარმომადგენელი საქართველოში ჯანდაცვის საერთაშორისო ექსპერტი, პროფესორი გიორგი ფხაკაძეა, საქართველოს 20-ზე მეტი კლინიკის აკრედიტაციის პროცესშია ჩართული.
ამჟამად “აკრედიტაცია კანადას” წარმომადგენლობა, გიორგი ფხაკაძის ხელმძღვანელობით, საქართველოშია და კლინიკებთან შეხვედრებს მართავს.
ნაყოფიერი შეხვედრის შემდეგ “შენი პულსი” კლინიკა “კონსილიუმ მედულას” განვითარებისა და კომუნიკაციების დირექტორ მარიამ თაბაგარს ესაუბრა:
“დღევანდელი შეხვედრა ძალიან მნიშვნელოვანი იყო. ეს უკვე მეორე შეხვედრაა, რომელიც “აკრედიტაცია კანადას” წარმომადგენლებთან გაიმართა. შუალედურ შეხვედრაზე გვქონდა შესაძლებლობა, აკრედიტაციის პროცესის მიმდინარეობის შესახებ დაგვესვა კითხვები და მიგვეღო მათზე პასუხები, უკეთ შეგვეფასებინა, რა პროგრესი გვაქვს, რა არის კიდევ გასაკეთებელი. კლინიკა “კონსილიუმ მედულაში” აქტიურად მიმდინარე აკრედიტაციის პროცესში ყველა თანამშრომელია ჩართული, რადგან ეს პროცესი გულისხმობს სისტემის გაუმჯობესებას ისე, რომ უფრო მეტად იყოს ორიენტირებული პაციენტზე.
ჩემი აზრით, ზოგადად კლინიკების აკრედიტაცია სწორედ ამ კუთხით არის განსაკუთრებით მნიშვნელოვანი: აკრედიტაცია რეალურად ხომ კლინიკის პაციენტზე ორიენტაციის მუდმივ გაღრმავებას გულისხმობს. შესაბამისად, მნიშვნელოვანია ყველა კლინიკამ გაიაროს აკრედიტაცია.“
