ჯანმრთელობის დაცვისა და სოციალურ საკითხთა კომიტეტმა პირველი მოსმენით განიხილა „ჯანმრთელობის დაცვის შესახებ” საქართველოს კანონში ცვლილების შეტანის შესახებ” კანონპროექტი და მისგან გამომდინარე კანონპროექტები. ინფორმაციას საქართველოს პარლამენტი ავრცელებს.
საკანონმდებლო პაკეტი კომიტეტის წევრებს ზოგადი პრინციპების დონეზე ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის პირველმა მოადგილემ თამარ გაბუნიამ გააცნო და აღნიშნა, რომ კანონპროექტის მიზანია ექთნების და მეანი-ექთნების საქმიანობის განვითარებისა და პროფესიული რეგულირების მდგრადი სისტემის ჩამოყალიბებისათვის სამართლებრივი გარემოს შექმნა. ამგვარად, კანონით ექთანი და მეანი-ექთანი პროფესიული სპეციალიზებული დასახელებები გახდება და, შესაბამისად, კანონით განისაზღვრება აღნიშნული საქმიანობების განხორციელების პირობები.
„კანონით დამკვიდრდება ახალი, გენდერულად ნეიტრალური ტერმინი – დამოუკიდებელი „მეანი-ექთანი”, რომლითაც ხდება „ბებიაქალის” წოდების ჩანაცვლება. ზოგადად, საკანონმდებლო პაკეტი ექთნებისა და მეანი-ექთნების საქმიანობის თანამედროვე საერთაშორისო მოთხოვნებთან შესაბამისობაში მოყვანას ითვალისწინებს.
მომხსენებლის ინფორმაციით, ექთნებისა და მეანი-ექთნებისთვის გათვალისწინებულია დიპლომისშემდგომი პროფესიული მზადების, უწყვეტი პროფესიული განვითარებისა და უწყვეტი პროფესიული განათლების სისტემების ამოქმედება, კანონმდებლობით განისაზღვრება ექთნის და მეანი-ექთნის საბაზისო განათლების პროგრამები, ექთნებისა და მეანი-ექთნების მიღებული განათლების შესაბამისად, ინერგება წოდებრივი რანჟირების სისტემა, შეიქმნება ექთნებისა და მეანი-ექთნების ავტორიზაციის ელექტრონული რეესტრი, რომლის საშუალებით განხორციელდება ექთნებისა და მეანი ექთნების რეგისტრაცია და სერტიფიცირება. სერტიფიცირებული პრაქტიკოსი ექთნებისთვის სერტიფიცირება 2025 წლის 1 სექტემბრამდე განხორციელდება უგამოცდოდ.
ინერგება ექთნის და მეანი-ექთნის საქმიანობაზე სახელმწიფო ზედამხედველობის მექანიზმი, რომლის განმახორციელებელია სამინისტრო და შესაბამისი საბჭო.
კომიტეტმა კანონპროექტების პარლამენტის პლენარულ სხდომაზე პირველი მოსმენით განსახილველად გატანას მხარი დაუჭირა.
ჯანმრთელობის დაცვისა და სოციალურ საკითხთა კომიტეტმა მეორე მოსმენით ასევე განიხილა კანონპროექტი „ნარკოტიკული საშუალებების, ფსიქოტროპული ნივთიერებების, პრეკურსორებისა და ნარკოლოგიური დახმარების შესახებ” საქართველოს კანონში ცვლილების შეტანის თაობაზე”, რომელიც მომზადდა გაეროს ნარკოტიკებზე კონტროლის საერთაშორისო კომიტეტის 1961 წლის „ნარკოტიკული საშუალებების შესახებ” ერთიანი და გაეროს 1971 წლის „ფსიქოტროპული ნივთიერებების შესახებ” კონვენციების თანდართულ სიებში 2022 წლის ბოლოს შეტანილი ცვლილებების საფუძველზე.
კერძოდ, გაეროს 1961 წლის „ნარკოტიკული საშუალებების შესახებ” ერთიანი კონვენციის I სიას დაემატა 2 ნივთიერება: ბრორფინი და მეტონიტაზენი; გაეროს 1971 წლის „ფსიქოტროპული ნივთიერებების შესახებ” კონვენციის II სიას დაემატა 1 ნივთიერება: ეუტილონი; გაეროს 1988 წლის „ნარკოტიკული საშუალებების და ფსიქოტროპული ნივთიერებების უკანონო ბრუნვის წინააღმდეგ ბრძოლის შესახებ” კონვენციის სიის I ცხრილს დაემატა 3 ნივთიერება: ნორფენტანილი, ტერტ-ბუტილ 4(ფენილამინო)პიპერიდინ1-კარბოქსილატი (1-ბოკ-4-აპ), N-ფენილ-4პიპერიდინამინი (4-აპ).
აღნიშნული კანონპროექტი მთავრობის საკანონმდებლო ინიციატივაა. საკითხი კომიტეტის სხდომაზე ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის პირველმა მოადგილემ თამარ გაბუნიამ წარადგინა.
კომიტეტმა საბოლოო, მესამე მოსმენით განიხილა კანონპროექტები „წამლისა და ფარმაცევტული საქმიანობის შესახებ” საქართველოს კანონში ცვლილების შეტანის თაობაზე” და „სახელმწიფო შესყიდვების შესახებ” საქართველოს კანონში ცვლილების შეტანის თაობაზე”. ცვლილებები მომხსენებელმა მინისტრის პირველმა მოადგილემ თამარ გაბუნიამ წარადგინა.
ცვლილების მიზანია ინოვაციურ (ახალ ორიგინალურ) ფარმაცევტულ პროდუქტზე ხელმისაწვდომობის გაზრდა, მისი სპეციალური პირობებით შესყიდვის გზით.
კომიტეტმა განხილულ საკითხებს მხარი დაუჭირა“,- აღნიშნულია ინფორმაციაში.
