აქონდროპლაზიის სამკურნალო მედიკამენტი „ვოსორიტიდი“ საქართველოში შემოვიდა.
ინფორმაცია ჯანდაცვის სამინისტროში დაგვიდასტურეს.
ინფორმაცია იაშვილის კლინიკის ხელმძღვანელმა ივანე ჩხაიძემაც დაგვიდასტურა.
მისი თქმით, აქონდროპლაზიის მედიკამენტი ნამდვილად მიიღეს უკვე იაშვილის კლინიკაში და დაიწყება მისი გამოყენება.
„ძალიან გახარებული ვართ. ამდენი წლის ოცნება ასრულდა, ბრძოლამ შედეგი გამოიღო. ხვალ ჩემი შვილი პირველი ბავშვი იქნება საქართველოში, ვინც ამ მედიკამენტს გაიკეთებს, შემდეგ – დანარჩენი სამი ბავშვი. ხვალ სულ მკურნალობას დაიწყებს ოთხი ბავშვი. 2024 წელს მედიკამენტს მიიღებს ყველა ბავშვი, ვისაც ასაკობრივად ეკუთვნის და ვისაც ესაჭიროება. ნებისმიერ მედიკამენტს შეიძლება ჰქონდეს გვერდით მოვლენა, ამისთვის მზად ვართ. ჩართულია იაშვილის ექიმების ჯგუფი. ჩვენ ყოველდღიური საუბარი გვაქვს. გვქონდა ონლაინჩართვა, დროსაც ექიმებმა გვითხრეს, რომ რისკჯგუფები გათვალისწინებულია, მომზადებულია ყველა ექიმი, ექთანი“, – განაცხადა ერთ-ერთმა მშობელმა, ქეთი ბეგიაშვილმა.
„თან ვიცინი, თან ვტირი, თან ვეღარ ვითმენ, ზეგამდე რომ არ გითხრათ. რამდენიმე წუთის წინ გავიგე, რომ წამალი ჩამოვიდა და უკვე იაშვილის კლინიკაშია. ზეგ ჩვენი თინეიჯერები პირველ დოზას გაიკეთებენ. დეტალური ინფორმაცია ჯერჯერობით არ გაუვრცელებია ჯანდაცვის სამინისტროს. წამალი დაიდო! “, – წერს აქონდროპლაზიის მქონე ბავშვის მშობელი მაუკნა გოჩიაშვილი. ის ერთ-ერთია იმ მშობელთაგან, რომლებიც თვეების განმავლობაში მართავდნენ აქციებს და აქოდროპლაზიის სამკურნალო მედიკამენტის შემოტანას სთხოვდნენ ხელისუფლებას.
სახელმწიფოს მიერ მედიკამენტ „ვოსორიტიდის“ შესყიდვას აქონდროპლაზიის დიაგნოზის მქონე ბავშვთა მშობლების რამდენიმეთვიანი საპროტესტო აქციები უძღოდა წინ. პროტესტის კვალდაკვალ სახელმწიფომ გაატარა არაერთი ცვლილება – აქონდროპლაზია შეიტანა იშვიათი დაავადებების სიაში, ხოლო პაციენტებს შშმ პირის სტატუსი განუსაზღვრა.
ჯანდაცვის სამინისტრომ აქონდროპლაზიის დაავადების მართვის ეროვნული პროტოკოლი შეიმუშავა და მართვის ერთ-ერთ საშუალებად მედიკამენტი „ვოსორიტიდი“ გაწერა.
