FDA-ის შეზღუდვები დიუშენის ექსპერიმენტულ სამკურნალო პრეპარატებზე – “ელევიდისი” აშშ-ის სააგენტოს ყურადღების ცენტრში მას შემდეგ მოექცა, როცა მკურნალობის ორი შემთხვევა ლეტალურად დასრულდა.
კუნთოვანი სისტემა ანატომიის ერთ-ერთი მთავარი ფუნქციური ღერძია, რომელიც სხეულის საერთო მასის 40 პროცენტს შეადგენს. როდესაც კუნთოვანი ქსოვილი იშლება, იწყება ყველაზე რთული პროცესი. თანამედროვე მედიცინა მას დიუშენის სინდრომით იცნობს.
დიუშენის კუნთოვანი დისტროფია განუკურნებელი დაავადებების კატეგორიაშია. სწორედ ამიტომ, მედიცინა ალტერნატიული მკურნალობის მეთოდებს იკვლევს. ერთ-ერთი ასეთი ექსპერიმენტული მედიკამენტი “ელევიდისია”. პრეპარატი აშშ-ის წამლებისა და სურსათის სააგენტოს ყურადღების ცენტრში მას შემდეგ მოექცა, როდესაც მოზარდების მკურნალობა ლეტალურად დასრულდა. ორივე შემთხვევა 2025 წელს მოხდა.
ფატალური შემთხვევების შემდეგ, აშშ-ის მთავარმა მარეგულირებელმა ორგანომ მკაცრი შეზღუდვები დააწესა. პრეპარატის მიღება აუკრძალეს მოზარდებს, რომელთაც დაავადების პროგრესირების გამო გადაადგილება არ შეუძლიათ. მწარმოებელმა კომპანიებმა ნებაყოფლობით შეაჩერეს “ელევიდისის” გამოყენება არა ამბულატორიულ პაციენტებშიც. ექსპერიმენტული პრეპარატის შემოტანას ითხოვენ საქართველოშიც. სახელმწიფოს კი ამ საკითხზე კონკრეტული პოზიცია აქვს. ჯანდაცვის სისტემა მკურნალობის პროცესში პაციენტების საუკეთესო ინტერესების შესაბამისად იმოქმედებს, სადაც უსაფრთხოების ზომებს გადამწყვეტი მნიშვნელობა ექნება.
ყოველწლიურად მსოფლიოში დიუშენის სინდრომით 20 000 მოზარდი ავადდება. პირველი ნიშნები 2-5 წლამდე ასაკში ჩნდება. დაავადება ასაკის მატებასთან ერთად პროგრესირებს. საქართველოში დიუშენის კუნთოვანი დისტროფია 100 ბავშვს აქვს. ქართველი მშობლები, კვლევების მიუხედავად, გამოსავალს ექსპერიმენტული მედიკამენტის გამოყენებაში ხედავენ. პასუხისმგებლობას შვილების ჯანმრთელობაზე კი საკუთარ თავზე იღებენ.
აშშ-ის სურსათისა და წამლების სააგენტოს ანგარიშში მოხვდა კიდევ ერთი ქეისი, სადაც “ელევიდისის” მიღების შემდეგ პაციენტს გულის მძიმე უკმარისობა და სისხლძარღვების პრობლემები დაეწყო. მთავარი მარეგულირებელი არსად წერს მყარი კლინიკური მტკიცებულებების შესახებ, რომ თერაპია კუნთოვან ატროფიას აჩერებს. უცხოურ გამოცდილებას ეყრდნობა და იზიარებს საქართველოც. სახელისუფლებო გუნდში მიაჩნიათ, რომ ყველა მხარე მეცნიერების საბოლოო დასკვნას უნდა დაელოდოს. საკითხი კი, რომელიც მოზარდების სიცოცხლეს ეხება სპეკულაციის საგანი არ უნდა გახდეს.
პრეპარატ ელევიდისს ამერიკული ბიოტექნოლოგიური კომპანია სარეპტა აწარმოებს. პაციენტების გარდაცვალების შემთხვევების შემდეგ, აშშ მთავარმა მარეგულირებელმა პრეპარატის ეტიკეტიც შეცვალა. გაჩნდა ე.წ შავი ჩარჩოს გაფრთხილება, სადაც სააგენტო პაციენტებს, ინექციის გამოყენების შემთხვევაში ღვიძლის დაავადების პოტენციურ რისკებზე აფრთხილებს. ახალი ეტიკეტირება ზღუდავს მკურნალობის გამოყენებას დიუშენის კუნთოვანი დისტროფიის, მქონე იმ პაციენტებისთვისაც, რომელსაც გადაადგილების პრობლემა არ აქვს.
დიუშენის სინდრომი ძირითადად ბიჭებში ვლინდება. მსოფლიოში დაავადებას 300 000-მდე ადამიანი ებრძვის. პარალელურად გრძელდება კვლევა საცდელ პრეპარატებზე.
