მთავრობა სკოლებისთვის 14 600 ცალ ლეპტოპს ყიდულობს|

ცენტრალური შემსყიდველი ორგანო სკოლებისთვის 14 600 ცალ ლეპტოპს ყიდულობს. შესაბამისი კონსოლიდირებული ტენდერი აუქციონის გარეშე დღეს გამოცხადდა.

შესყიდვის სავარაუდო ღირებულება 30 660 000 ლარია. შესაბამისად, ერთი ერთეულის ფასი 2100 ლარი გამოდის.

როგორც სატენდერო დოკუმენტაციაში წერია, ლეპტოპების შესყიდვა შპს საგანმანათლებლო რესურსებისთვის იგეგმება, რომელიც თავის მხრივ სკოლებისთვის სხვადასხვა სახის რესურსების უზრუნველყოფაზეა პასუხისმგებელი.

ლეპტოპების შესყიდვის მიზნით, დღეს გამოცხადებული ტენდერის მიხედვით, მიმწოდებელი ვალდებულია საქონლის მიწოდება განახორციელოს სატენდერო კომისიის ოქმით ხელშეკრულების გაფორმების შესაძლებლობის დადასტურებიდან არაუგვიანეს 120 კალენდარული დღისა.

წინადადებების მიღება 3 აგვისტოს დაიწყება და 4 აგვისტოს დასრულდება.