სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა შიო III-მ ქადაგებისას აღნიშნა, რომ მხოლოდ ცოდნა და მეცნიერება არ არის საკმარისი საზოგადოების სულიერი და ზნეობრივი განვითარებისათვის.
მისი თქმით, თუ ადამიანს ზნეობრივი საფუძველი არ გააჩნია, მეცნიერება და ცოდნა შესაძლოა ბოროტების სამსახურშიც აღმოჩნდეს.
პატრიარქის განმარტებით, თანამედროვე საზოგადოებაში ხშირად ავიწყდებათ, რომ ქრისტიანული სწავლებით იესო ქრისტე არის „გზა, ჭეშმარიტება და სიცოცხლე“, ხოლო მხოლოდ ადამიანურ გონებაზე და მეცნიერულ პროგრესზე დამყარებული განვითარება სრულფასოვან სულიერ აღორძინებას ვერ უზრუნველყოფს.
მისივე თქმით, მეცნიერება და განათლება აუცილებელია, თუმცა ადამიანის შინაგანი სამყაროს გარდაქმნისთვის საჭიროა ძალა, რომელიც არა მხოლოდ გონებაზე, არამედ გულზეც მოქმედებს. პატრიარქმა აღნიშნა, რომ ადამიანის ქმედებების წყარო მისი შინაგანი მდგომარეობაა და სწორედ ამიტომ აქვს განსაკუთრებული მნიშვნელობა სულიერ და ზნეობრივ აღზრდას.
შიო III-ის განცხადებით, ქრისტეს რწმენას შეუძლია ყველაზე მძიმე სულიერ მდგომარეობაშიც კი გააღვივოს ადამიანში სიკეთის, სულიერებისა და ზნეობრივი განახლების სურვილი და დააყენოს იგი გადარჩენის გზაზე.
