თერჯოლის მუნიციპალიტეტის სოფელ გოგნში გიორგობის დღესასწაული განსაკუთრებით აღნიშნეს. წელიწადში ორჯერ, გიორგობას, ამ ადგილს უამრავი მომლოცველი სტუმრობს და წმინდა გიორგის სურვილების ასრულებას სთხოვს.

ეს საქართველოში ერთადერთი ეკლესიაა, რომელსაც კარი არ აქვს. ის არასდროს იკეტება და ადამიანებს სალოცავში შესვლა ნებისმიერ დროს შეუძლიათ.

საკვირველთმოქმედი და ძლევაშემოსილი გიორგი ქართველი ერის მფარველად მიიჩნევა. წმინდანი საქართველოში განსაკუთრებულად უყვართ.

გადმოცემის თანახმად, ვინც ამ დღეებში ტაძარს სამჯერ შემოუვლის, ყველა სურვილი აუსრულდება. თუ გოგნის სალოცავს გიორგობას ეწვევით, თავად იხილავთ ტაძრისკენ მიმავალ ათასობით ადამიანს, რომელთა უმეტესობა გზას ფეხშიშველი მიუყვება.

სოფელში მდებარეობს წმინდა გიორგის უძველესი სალოცავი. გოგნის წმინდა გიორგის სახელობის ეკლესია VII-VIII საუკუნეების არქიტექტურულ ძეგლს წარმოადგენს. გადმოცემის თანახმად, მას კარუგდებელსაც უწოდებენ, რადგან ტაძარს კარი არ უჩერდებოდა.

ამ დღეს გოგნის კარუგდებელს ქვეყნის სხვადასხვა რეგიონიდან ჩამოსული ათასობით მომლოცველი სტუმრობს.
მომლოცველებს ადგილზე  შესაწირად შინაური ფრინველები და ცხოველები მიჰყავთ.

გოგნის უძველესი სალოცავი მცირე მოცულობისაა, ამიტომ პატრიარქის ლოცვა-კურთხევით მის მიმდებარე ტერიტორიაზე ახალი ტაძარი შენდება, რომლის სიმაღლე 52 მეტრს შეადგენს.