შინაგან საქმეთა სამინისტროს განცხადებით, ერთ-ერთ რესტორანში დაპირისპირებაში მონაწილე, სამმართველოს შენობაში შეუძლოდ გახდა და ორ დღეში კლინიკაში გარდაიცვალა. ჯგუფური ძალადობის ბრალდებით კი სამი ადამიანია დაკავებული. ფაქტის შესახებ ინფორმაცია მიაწოდეს სპეციალურ საგამოძიებო სამსახურსაც. მინისტრის მოადგილემ ალექსანდრე დარახველიძემ მოუწოდა მედიას და საზოგადოებას, საქმეზე არ გაავრცელონ არასწორი ინფორმაცია.
შინაგან საქმეთა სამინისტროში ცოტა ხნის წინ განცხადება გააკეთა მინისტრის მოადგილემ. ალექსანდრე დარახველიძემ ისაუბრა კონკრეტულ შემთხვევასთან დაკავშირებით.
საქმე ეხება ერთ-ერთ რესტორანთან მომხდარ დაპირისპირებას, რა დროსაც, მოქალაქეებს შორის მომხდარი ჩხუბის დროს კონკრეტულმა პირებმა დაზიანებები მიიღეს. ამის შემდეგ, დაიწყო საგამოძიებო მოქმედებები. პოლიციის ერთ-ერთ განყოფილებაში გამოკითხვაზე მისული პირი შეუძლოდ გახდა.
მინისტრის მოადგილის განცხადებით, სამართალდამცველებმა სამედიცინო დახმარება გამოიძახეს და მამაკაცი კლინიკაში გადაიყვანეს, თუმცა ის ორ დღეში გარდაიცვალა. ფაქტის შესახებ მოხდა სპეციალური საგამოძიებო სამსახურის ინფორმირება.
ალექსანდრე დარახველიძე მოუწოდებს მედიას და საზოგადოებას, არ გაავრცელონ არასწორი ინფორმაცია.
