ევროპარლამენტმა 405 ხმით მიიღო რეზოლუცია, რომელშიც ევროკავშირის წევრ ქვეყნებში კანონის უზენაესობის მდგომარეობის მნიშვნელოვან გაუარესებაზეა საუბარი.
რეზოლუციის წინააღმდეგ 210 დეპუტატმა მისცა ხმა, ხოლო 36 დეპუტატმა ხმის მიცემისგან თავი შეიკავა.
ანგარიში მიუთითებს ევროკავშირის მთელ ტერიტორიაზე სისტემურ და ახალ საფრთხეებზე. განსაკუთრებული შეშფოთება გამოხატულია სასამართლო გადაწყვეტილებების შეუსრულებლობის ტენდენციების, სამოქალაქო სივრცის შევიწროებისა და ევროკავშირის ღირებულებებზე თავდასხმების გამო.
ევროპარლამენტი ხაზს უსვამს დამოუკიდებელი და ეფექტური მართლმსაჯულების სისტემის მნიშვნელობას და აკრიტიკებს კორუფციის გამოძიებაში ჩარევას, სასამართლო სისტემის პოლიტიკური მიზნებისთვის გამოყენებას.
დეპუტატებმა დაგმეს პრესის თავისუფლებაზე თავდასხმები, ჟურნალისტებისა და სამოქალაქო საზოგადოების წარმომადგენლების წინააღმდეგ სპეციალური პროგრამების გამოყენება და დემოკრატიულ პროცესებს ზიანის მომტანი ცრუ ინფორმაციის გავრცელება.
რეზოლუციაში აღნიშნულია უმცირესობების, განსაკუთრებით ლგბტქი+ პირების უფლებების დაცვის გაუარესება. ევროპარლამენტმა გასცა მოწოდება სიძულვილით მოტივირებული დანაშაულებისა და სიძულვილის ენის კრიმინალიზაციის შესახებ ევროკავშირის დონეზე.
ანგარიშში საუბარია უნგრეთის მხრიდან ევროკავშირის ღირებულებების სისტემურ დარღვევებზე, პროკურატურაზე პოლიტიკურ ზეგავლენასა და ევროკავშირის ფონდების არასათანადო გამოყენებაზე
„სოციალისტებისა და დემოკრატების პროგრესული ალიანსის“ წარმომადგენელმა ანა კატარინა მენდესმა განაცხადა, რომ ევროპარლამენტს არ შეუძლია ევროპული ღირებულებების საფრთხეების იგნორირება.
„დემოკრატია ვითარდება ხელისუფლების დაყოფის, პრესის თავისუფლების, მართმსაჯულების ხელმისაწვდომობისა და ფუნდამენტური თავისუფლებების პატივისცემის საფუძველზე. ამის გარეშე, კანონის უზენაესობა ცარიელ ფორმალობად იქცევა და ავტორიტარიზმისთვის სივრცე იხსნება. ამ პარლამენტს არ შეუძლია ჩვენი ღირებულებების საფრთხეების იგნორირება, როცა იტალიაში ჟურნალისტებს სპეციალური პროგრამებით მიზანში იღებენ, უნგრეთში ლგბტქი+ პირების ძირითად სამოქალაქო თავისუფლებებს თავს ესხმიან და პოლონეთში ახალი ნაციონალისტი პრეზიდენტი რეპროდუქციულ თავისუფლებას ემუქრება“, – განაცხადა ანა კატარინა მენდესმა.
რეზოლუცია წარმოადგენს ევროპარლამენტის წვლილს კომისიის 2025 წლის კანონის უზენაესობის ანგარიშის მომზადებაში.
დეპუტატებმა მოუწოდეს კომისიას, უფრო მკაცრი რეკომენდაციები ჩართოს და იმუშაოს მეთოდების გაუმჯობესებაზე. ასევე, ევროკავშირის ყველა ინსტიტუტს მოუწოდეს საფრთხეების წინააღმდეგ ერთმანეთთან თანამშრომლობის გაძლიერებისკენ.
