საგაზაფხულო სესიაზე პარლამენტს წარედგინება საკანონმდებლო ინიციატივას, რომლის მიხედვითაც, იმ შემთხვევაში თუ მოქალაქე არ ასრულებს ქირავნობის ხელშეკრულებით ნაკისრ ფინანსურ ვალდებულებას, სასამართლოს გარეშე, აღსრულების ეროვნულმა ბიურომ უნდა განახორციელოს უძრავი ქონებიდან პირის გამოყვანა.
როგორც „პალიტრანიუსისა“ და რადიო „პალიტრის“ გადაცემაში „საქმე“ პარტია „მოქალაქეების“ იურისტმა გიორგი რეხვიაშვილმა განაცხადა, აღნიშნული კანონის მიღების შემთხვევაში, სასამართლო დავები წლები არ გაგრძელდება და ე.წ ურჩი მდგმურების პრობლემა 1-დან 3-თვემდე პერიოდში მოგვარდება.
„გვქონდა სამი ინიციატივა, ერთი შეეხებოდა 2015 წლამდე არსებული კანონმდებლობის აღდგენას საპოლიციო გამოსახლების, თუმცა მანდ შეიძლება მეტი დეტალი ყოფილიყო და არ შეხებოდა იპოთეკით დაზარალებულებს. მეორე ინიციატივა გვქონდა რომ სასამართლოში ცალკე ჯგუფი შემდგარიყო, რომელიც კონკრეტულად ამ საკითხზე დაიწყებდნენ მუშაობას. უმარტივესი დავაა, დაადგინო ადამიანი იხდის თუ არა ქირას, ამისთვის რა არის საჭირო 5 წელი ჩარიცხა თუ არა ხელშეკრულებით ნაკისრი ვალდებულება.
მესამე გაითვალისწინა იუსტიციის სამინისტრომ და საგაზაფხულო სესიაზე წარმოადგენს საკანონმდებლო ინიციატივის სახით. დღეს არსებული მდგომარეობით, სარჩელი შეგვაქვს პირველ ინსტანციაში, ასაჩივრებს მეორე მხარე აპელაციაში, უზენაესში და შემდეგ მივდივართ აღსრულების ეროვნულ ბიურომდე. ეს პირები მაინც აღსრულების ბიუროს უნდა გამოესახლებინა. საბოლოო ინსტანცია არის ის, რომ პირდაპირ აღსრულების ბიურომ განიხილოს და განახორციელოს ეს მოქმედებები, რომელსაც დღეს ახორციელებს სასამართლო. დაახლოებით 1-დან 3 თვემდე უნდა გაგრძელდეს მსგავსი ტიპის დავები“, – ამბობს რეხვიაშვილი.
მისი თქმით, ერთ-ერთი წინაპირობაა ის, რომ გამქირავებელსა და დამქირავებელს შორის უნდა დაიდოს ხელშეკრულება, სადაც მითითებული იქნება ქირავნობის ფასი და ქირავნობის ხელშეკრულება აუცილებლად უნდა გაფორმდეს საჯარო რეესტრში.
„უნდა არსებობდეს ხელშეკრულება დამქირავებელს და გამქირავებელს შორის და ხელშეკრულებაში უნდა ჩაიწეროს შესაბამისი მუხლი, სადაც იქნება შესაბამისი ჩანაწერი, რომ თუ პირი არ ასრულებს ფინანსურ ვალდებულებას რომელიც არის ხელშეკრულებით გათვალისწინებული, სასამართლოს გარეშე აღსრულების ეროვნულმა ბიურომ უნდა განახორციელოს უძრავი ქონებიდან პირის გამოყვანა. ორივე პირის თანხმობა უნდა არსებობდეს. აღნიშნული ქირავნობის ხელშეკრულება უნდა გაფორმდეს რეესტრში“, – განაცხადა გიორგი რეხვიაშვილმა.
გარდა ამისა, როგორც რეხვიაშვილმა აღნიშნა, ხელშეკრულება უნდა მოიცავდეს ჩანაწერის იმის თაობაზე, თუ რა ფორმით მოხდა გადახდა – ნაღდი თუ უნაღდო ანგარიშსწორებით.
„ხელშეკრულებაში უნდა იყოს ჩანაწერი, როგორ ხდება თანხის გადახდა, არის ნაღდი ან უნაღდო. არის მითითება რომ ნაღდი, ან უნაღდო ანგარიშსწორებით. თუ მით უმეტეს რომ არის უნაღდო, ქვითრით ხდება დამოწმება, როდესაც ხდება ნაღდი ფულით გადახდა ამ შემთხვევაში დაცვის მექანიზმი არის რომ ხელწერილი შედგეს თანხის გადაცემასთან დაკავშირებით“, – განაცხადა გიორგი რეხვიაშვილმა. წყარო
მასალის გამოყენების პირობები
