ეგეოსის ზღვაში, კუნძულ სანტორინისთან ძლიერი სეისმოლოგიური აქტივობა არ წყდება, რის გამოც კუნძულზე სკოლებიც კი დაიხურა. ექსპერტები არ გამორიცხავენ, რომ რეგიონში შესაძლოა კიდევ უფრო ძლიერი ბიძგები მოხდეს. ინფორმაციას euronews-ი ავრცელებს.
სანტორინის და ამორგოსის კუნძულებს შორის 4.5 მაგნიტუდის სიმძლავრის ბიძგები ფიქსირდება, ეპიცენტრი სანტორინიდან ჩრდილო-აღმოსავლეთით 36 კილომეტრის დაშორებით, 2 კილომეტრის სიღრმეზეა.
მანამდე 4.1 მაგნიტუდის მიწისძვრა დაფიქსირდა, რომლის ეპიცენტრი სანტორინიდან ჩრდილო-აღმოსავლეთით 28 კილომეტრში იყო, ეპიცენტრი 10 კილომეტრის სიღმეზე მდებარეობდა.
4,1 მაგნიტუდის სიმძლავრის კიდევ ერთი მიწისძვრა სანტორინისა და ამორგოსს შორის საზღვაო ზონაში დაფიქსირდა.
მედიის ცნობით, 48 საათის განმავლობაში რეგიონში 10-ზე მეტი მიწისძვრა იყო. ექსპერტები განმარტავენ, რომ მიწისძვრები ვულკანური არ არის, თუმცა მუდმივი აქტიურობა მიუთითებს იმაზე, რომ შესაძლოა უფრო ძლიერი მიწისძვრაც მოხდეს.
