პრინცი ჰარი – ბრიტანეთის სამეფო ოჯახის წევრი, სასექსის ჰერცოგი რუსეთის სრულმასშტაბიანი სამხედრო აგრესიის დაწყების შემდეგ პირველად ეწვია უკრაინას.

ამის შესახებ მეწარმე და ცენტრ „სუპერადამიანების“ დამფუძნებელი, ანდრეი სტავნიცევი იუწყება.

პრინცი ჰარი, ლვოვში ვიზიტის დროს, დაჭრილი უკრაინელი ჯარისკაცების სარეაბილიტაციო დაწესებულებას, ცენტრ „სუპერადამიანებს“ ეწვია. ეს სტუმრობა ამ სფეროში სასექსის ჰერცოგის ხანგრძლივი საქმიანობის ერთგვარი გაგრძელება. მან 2014 წელს დააარსა „ინვიქტუსის თამაშების ფონდი“, რომელიც ატარებს საერთაშორისო ასპარეზობას დაჭრილ ჯარისკაცებსა და ვეტერანებს შორის. თავად ჰარი 10 წლის განმავლობაში მსახურობდა ბრიტანეთის არმიაში, ორჯერ იმყოფებოდა ავღანეთის საბრძოლო მისიებში და ომში ახლო მეგობრები დაკარგა.

ვიზიტის ფარგლებში, ის შეხვდა უკრაინელ ომის ვეტერანებს, რომლებიც კანადაში წელს გამართულ „ინვიქტუსის თამაშებში“ მონაწილეობდნენ. სწორედ იქ აჩუქა უკრაინის დელეგაციამ ჰარის სამაჯური წარწერით, „ვინც ერთ სიცოცხლეს იხსნის, მთელ სამყაროს იხსნის“, და როგორც აღმოჩნდა, პრინცი ამ საჩუქარს დღემდე ატარებს.

ჰარი პირადად ესაუბრა ასპარეზობის თითოეულ მონაწილეს და მათ მიმართ გულწრფელი ინტერესი და სითბო გამოხატა. არანაირი სამეფო ფორმალობა – შეხვედრის დროს იყო ჩახუტება, გულწრფელი კომპლიმენტები, ყურადღების გამოჩენა და „სუპერადამიანების“ მისიის ღრმა გაგება.

„ეს არის ჩემი პირველი ვიზიტი უკრაინაში და, რა თქმა უნდა, არა უკანასკნელი. ჩემთვის დიდი პატივია „ინვიქტუსის“ დელეგაციასთან ყოფნა, ასევე „სუპერადამიანთა“ ცენტრში მოსვლა და იმის ნახვა, თუ როგორი ზრუნვის ქვეშ იმყოფებიან ერთ ჭერქვეშ აქ მცხოვრები ადამიანები“, – ასე გამოხატა თავის შთაბეჭდილებები პრინცმა ჰარიმ.