ნორვეგიის მთავრობამ 16 წლამდე ასაკის ბავშვებისთვის სოციალური მედიის გამოყენების აკრძალვის შესახებ კანონპროექტი შეიმუშავა.
პრემიერ-მინისტრმა იონას გარ სტორემ განაცხადა, რომ ქვეყანას ბავშვებისთვის უსაფრთხო გარემოს შექმნა სურს. მისი თქმით, მოზარდის ყოველდღიური ცხოვრება ალგორითმებსა და ეკრანებს არ უნდა დაეთმოს. ამასთან, ქვეყნის ლიდერი მიიჩნევს, რომ ეს ნაბიჯი მოზარდებს ციფრული საფრთხეებისგან დაიცავს.
როგორც ირკვევა, აღნიშნული დოკუმენტი საკანონმდებლო ორგანოს წლის ბოლომდე წარედგინება. დოკუმენტის თანახმად, ასაკის გადამოწმების პროცესზე პასუხისმგებლობა სრულად ტექნოლოგიურ კომპანიებს დაეკისრებათ. დარღვევების შემთხვევაში კი მოცულობითი ჯარიმის გადახდა სწორედ მათ მოუწევთ.
აღსანიშნავია, რომ ევროპის რამდენიმე ქვეყანამ მსგავსი რეგულაციები უკვე მიიღო, რამდენიმე კი დაწესების შესაძლებლობას აქტიურად განიხილავს. ამ მიმართულებით პირველი ნაბიჯი გასული წლის დეკემბერში გადადგა ავსტრალიამ, რომელმაც 16 წლამდე პირებისთვის სოციალური ქსელები აკრძალა. ავსტრალიური მოდელი Meta-ს აპლიკაციებს, ასევე TikTok-ს, Snapchat-ს, YouTube-სა და X-ს მოიცავდა. ნორვეგიის ხელისუფლებას ჯერ არ დაუკონკრეტებია, თუ რომელ პლატფორმებზე გავრცელდება ახალი წესი. თუმცა, მოსალოდნელია, რომ შეზღუდვა ყველა მსხვილ სოციალურ ქსელს შეეხება.
ცნობისთვის, სოციალური მედიის გავლენა მოზარდების ფსიქიკურ ჯანმრთელობაზე ბოლო წლებში გლობალური განხილვის საგანი გახდა. საერთაშორისო ორგანიზაციების მიერ ჩატარებულმა კვლევებმა აჩვენა, რომ ეკრანთან გატარებული ჭარბი დრო ბავშვებში შფოთვასა და ძილის დარღვევას იწვევს.
