გამოცემა Hollywood Reporter-ის ექსკლუზიური ინფორმაციის თანახმად, ვენტურაში, კალიფორნიაში, კერძო პირის მფლობელობაში არსებული მაიკლ ჯექსონის უცნობი ჩანაწერები აღმოაჩინეს. მასალა 1989-1991 წლებით თარიღდება.
ყველაფერი მაშინ დაიწყო, როდესაც ადგილობრივ პოლიციას ანონიმურად დაუკავშირდა პირი და აცნობა, რომ ერთ-ერთ სახლში პოპის ლეგენდის გამოუქვეყნებელი ჩანაწერები ინახებოდა. სახლი ოდესღაც მუსიკალურ პროდიუსერსა და მომღერალს, ბრაიან ლორენს ეკუთვნოდა. სავარაუდოდ, პირველად სწორედ მის ხელში აღმოჩნდა უცნობი მასალა.
მუსიკალურ ფირზე 12 სიმღერაა. როგორც ირკვევა, მათზე ჯექსონი ლეგენდარულ ალბომ Dangerous-ის გამოქვეყნებამდე მუშაობდა. ოფიციალური გამოძიება უკვე დაწყებულია, თუმცა Hollywood Reporter-ის სტატიაში ვკითხულობთ, რომ მასალის ავთენტიკურობა დადასტურებულია და უცნობი ჩანაწერები ნამდვილად მაიკლ ჯექსონს ეკუთვნის.
მასალის ფინანსური ღირებულება ჯერჯერობით არ დათვლილა, თუმცა გამოცემა ვარაუდობს, რომ სულ მცირე ათობით მილიონ დოლარზეა საუბარი. ასევე სტატიაში ვკითხულობთ, რომ ჩანაწერები სულ მალე აუქციონზე გამოჩნდება.
მასალის გამოყენების პირობები
