ირლანდიიდან საქართველოში 52 პირი გამოაძევეს

ირლანდიიდან საქართველოში, საერთო ჯამში, 52 ადამიანი გამოაძევეს ჩარტერული რეისით, რომელიც დუბლინიდან წუხელ გაფრინდა.

45 ზრდასრული და შვიდი არასრულწლოვანი, რომლებიც ოჯახების მეთვალყურეობის ქვეშ იყვნენ, თბილისში დღეს დილით, ირლანდიის დროით 2:30 საათზე, ჩაფრინდა.

ეს წელს ჩარტერული რეისების გამოყენებით დეპორტაციის მეექვსე შემთხვევაა. ამგვარად, ჩარტერული რეისებით წელს გაყვანილი ადამიანების საერთო რაოდენობამ 205-ს მიაღწია, კიდევ 146 პირი კი ქვეყნიდან კომერციული რეისებით გაიყვანეს.

იუსტიციის, შინაგან საქმეთა და მიგრაციის მინისტრის, ჯიმ ო’კალაგენის განცხადებით, დეპორტაციები და ქვეყნიდან გაძევება წლის ბოლომდე გაგრძელდება.

- Advertisement -

„მსურს, კიდევ ერთხელ გავიმეორო, რომ თუ პირს საერთაშორისო დაცვის განაცხადზე უარს ეტყვიან და სახელმწიფოს დატოვებას მოსთხოვენ, მან ეს უნდა გააკეთოს. თუ ისინი ნებაყოფლობით არ წავლენ, მათ წასვლას აიძულებენ“, – განაცხადა მან.

მინისტრმა ო’კალაგენმა ასევე აღნიშნა, რომ მიმდინარე წელს უკვე დეპორტაციის 3 870-ზე მეტ ორდერს მოეწერა ხელი, რაც ბოლო 20 წელიწადში სახელმწიფოდან ჩარტერული და კომერციული რეისებით დეპორტირებულთა ყველაზე დიდ რაოდენობას წარმოადგენს.

„მსურს, ხაზი გავუსვა, რომ ირლანდიაში მცხოვრები საქართველოს მოქალაქეების უმრავლესობა აქ ლეგალურად იმყოფება და სახელმწიფოში სხვადასხვა ხელმისაწვდომი კანონიერი გზით შემოვიდა. მათ მივესალმებით, რადგან უდიდესი წვლილი შეაქვთ ჩვენი ეკონომიკისა და საზოგადოების წინსვლაში“, – დასძინა მან.

დეპორტირებულებს ფრენისას თან ახლდნენ პოლიციის (gardaí) თანამშრომლები, სამედიცინო პერსონალი, თარჯიმანი და ადამიანის უფლებათა დამკვირვებელი.

- Advertisement -