ბორჯომის ვაგზლის ტერიტორიაზე მომხდარ ხანძართან დაკავშირებით, „თბილისი ცენტრალის“ ადმინისტრაცია აცხადებს სრულ მზადყოფნას, უმოკლეს ვადებში შეიმუშაოს ახალი სავაჭრო სივრცის რეკონსტრუქციის პროექტი, რომელიც თანამედროვე სტანდარტებს სრულად დააკმაყოფილებს.
„მიმდინარე წლის 30 აპრილს, დაახლოებით დილის 06:00 საათზე, ვაგზლის მოედნის მიმდებარედ, ე.წ ბორჯომის ვაგზლის ტერიტორიაზე არსებულ ბაზრობაზე გაჩნდა ხანძარი, რის შედეგადაც სრულად დაიწვა 12 000 მ2 სავაჭრო და სასაწყობო სივრცე. აღნიშნული ტერიტორია 49-წლიანი გრძელვადიანი იჯარით აღებული აქვს ს.ს „თბილისი ცენტრალს“ საქართველოს რკინიგზისგან. არსებული საიჯარო ხელშეკრულების ქვეშ, ამ ტერიტორიაზე ბაზრობის მოწყობას და ფუნქციონირებას ქვეიჯარის ხელშეკრულების საფუძველზე ახორციელებდა შპს ბაქანი. ხანძრის შედეგად დაზარალდა შპს ბაქანი და მათ მიერ დასაქმებული 300-ზე მეტი მოვაჭრე, სს „თბილისი ცენტრალი“ და მისი სხვა მოიჯარეები რომლებმაც ერთობლივად რამდენიმე მილიონი ლარის ინვესტიცია განახორციელეს აღნიშნული ტერიტორიის ინფრასტრუქტურის მოწყობაში.
მიუხედავად მიღებული მნიშვნელოვანი ზარალისა, სს „თბილისი ცენტრალი“ აცხადებს სრულ მზაობას, უმოკლეს ვადებში მოამზადოს ბორჯომის ვაგზლის ტერიტორიაზე სავაჭრო სივრცის რეკონსტრუქციის პროექტი, რომელიც სრულ შესაბამისობაში იქნება მსგავსი სივრცეების ოპერირების თანამედროვე ნორმებსა და მოთხოვნებთან. სს „თბილისი ცენტრალს“ გააჩნია ყველანაირი საჭირო რესურსი, რომ შესაბამისი სახელმწიფო სტრუქტურების მხრიდან ოპერატიული თანხმობის მიღებისთანავე, განახორციელოს საჭირო ინვესტიცია სავაჭრო სივრცის მაქსიმალურად მოკლე ვადებში რეკონსტრუქციისთვის, რაც საშულებას მისცემს დაზარალებულ მოიჯარეებს, აღადგინონ კომერციული საქმიანობა. ვითვალისწინებთ რა, დაზარალებული მოვაჭრეების მდგომარეობას, ბაზრობის ოპერატორთან ერთად ვიხმართ ყველანაირ ღონეს, რომ მათ შევთავაზოთ კომერციული საქმიანობის განახლების შეღავათიანი პირობები და ხელი შევუწყოთ, დაუბრუნდნენ ცხოვრების ნორმალურ რითმს“, – ნათქვამია განცხადებაში.
#drpkhakadze #გიორგიფხაკაძე #davidiani #sheniambebi #აქხარისხია
