თბილისის ბაგა-ბაღების მართვის სააგენტომ 4 საჯარო ბაღის დირექტორი და კიდევ რამდენიმე თანამშრომელი გაათავისუფლა. საუბარია №17, №38, №28 და №1 ბაღებზე, სადაც მონიტორინგის შედეგად სერიოზული ხარვეზები გამოვლინდა.
ბაღების სააგენტოს ინფორმაციით, აღნიშნული ქმედება წარმოადგენს თბილისის ბაგა-ბაღების სისტემაში მიმდინარე ორგანიზაციული ცვლილებების ნაწილს. როგორც უწყება განმარტავს, დაიწყო კომპლექსური მონიტორინგის პროცესი, რომლის მიზანია სააღმზრდელო და ადმინისტრაციული პროცესის შესაბამისობა კანონთან და სტანდარტებთან, დისციპლინური და მენეჯერული პასუხისმგებლობის განსაზღვრა და ბაღების მართვის ეფექტიანობის გაუმჯობესება.
,,მონიტორინგის შედეგად გამოვლინდა მნიშვნელოვანი ხარვეზები. საბავშვო ბაგა-ბაღის გამართულ ფუნქციონირებაზე პასუხისმგებელია ბაღის დირექტორი, რომელიც წარმოადგენს სააგენტოს მინდობილ პირს. რამდენიმე ბაღში გამოვლენილი დარღვევების სიმძიმემ აჩვენა, რომ ბაღის მენეჯერები ვერ ართმევდნენ თავს მათზე დაკისრებულ მოვალეობებს, რაც თავის მხრივ ზიანს აყენებს სააღმზრდელო პროცესს. შესაბამისად, გათავისუფლდა ოთხი საბავშვო ბაგა-ბაღის დირექტორი და რამდენიმე თანამშრომელი; ზოგიერთი დასაქმებულის მიმართ გატარდა სხვადასხვა სახის დისციპლინური პასუხისმგებლობის ზომები. აღსანიშნავია, რომ მონიტორინგი, რომელიც უზრუნველჰყოფს თბილისის საბავშვო ბაგა-ბაღებში სააღმზრდელო თუ ადმინისტრაციული პროცესის კანონთან თუ სხვადასხვა სტანდარტებთან შესაბამისობის დაცვას, მუდმივია და გაგრძელდება”, – განაცხადეს თბილისის ბაგა-ბაღების სააგენტოში.
#drpkhakadze #გიორგიფხაკაძე #davidiani #sheniambebi #აქხარისხია
მასალის გამოყენების პირობები
