გიორგი მიქაუტაძე ლიონთან ახლოს მდებარე საავადმყოფოს ეწვია და ბავშვებს „ლიონის“ სტადიონზე გამართულ საქველმოქმედო აქციაში შეგროვებული თანხა და საჩუქრები გადასცა.
ბავშვებთან შეხვედრის შემდეგ საქართველოს ნაკრებისა და „ლიონის“ თავდამსხმელი გუნდთან ერთად თურქეთში გაემგზავრა, სადაც ევროპის ლიგის მატჩი ელოდება.
„დიდი მადლობა ყველას, ვინც „ლიონის“ სტადიონზე საკლუბო მაღაზიაში გამართულ საქველმოქმედო აქციაში მონაწილეობა მიიღო და გულუხვი საჩუქრებით ბავშვების დახმარებაში საკუთარი წვლილი შეიტანა. ეს წუთები ჩემთვის ძალიან სასიამოვნო იყო.
ასევე, მადლობა იმ ადამიანებს, რომლებმაც ამ ღონისძიების ორგანიზება შეძლეს. განსაკუთრებული მადლობა „ლიონის“ საქველმოქმედო ფონდსა და კლუბს ასეთი შესაძლებლობისთვის“, – წერს სოციალურ ქსელში გიორგი მიქაუტაძე.
„ლიონი“ თურქეთში 23 იანვარს, თბილისის დროით 21:45 საათზე, ევროპის ლიგის ძირითად ეტაპზე „ფენერბახჩეს“ დაუპირისპირდება.
